Կաթողիկոսի ընտրություններին պետությանը ներգրավելու վերաբերյալ վարչապետ Նիկոլ Փաշինյանի կոչը համարժեք է սահմանադրական կարգի տապալման նախապատրաստության, հայտարարել է «Հինգ իրավապաշտպանների նախաձեռնությունը»։
Իրավաբանները բացատրել են, որ պետությունից եկեղեցու անջատ կարգավիճակը ՀՀ սահմանադրական կարգի հիմունքներից մեկն է և, հետևաբար, վարչապետը կատարել է «ծանր հանցագործություն», որը քրեորեն հետապնդելի է։
Նրանք Փաշինյանին մեղադրել են եկեղեցին փաստացի բռնազավթելու մտադրության մեջ, և նրա հայտարարությունների շարքը որակել որպես «երկօրյա հարձակման գագաթնակետ, որը համեմված էր բացառիկ ցինիզմով»։ Միևնույն ժամանակ, նախաձեռնությունն անիմաստ է համարել այս հարցի վերաբերյալ քրեական հայց ներկայացնելը, քանի որ, ըստ նրանց, իրենք արդեն բազմիցս համոզվել են իրավասու մարմինների «քաղաքական ենթակայության» մեջ։
Եզրափակելով՝ փաստաբանները Հայաստանի բոլոր քաղաքացիներին կոչ են արել պաշտպանել սահմանադրական կարգն ու Ազգային եկեղեցին։
Մայիսի 29-ին Փաշինյանը հայտարարել էր, թե «հայկական եկեղեցիները չուլանոց, աղբավայր են դարձրել»։ Մայիսի 30-ի առավոտյան վարչապետը մի շարք գրառումներով անդրադարձել էր հոգևորականների՝ իրեն ուղղված քննադատություններին, որոնք հնչել էին նրա հայտարարություններին ի պատասխան։
Փաշինյանը նաև ՀՀ իշխանություններին կոչ էր արել մասնակցել կաթողիկոսի ընտրություններին՝ պնդելով, որ կաթողիկոսի թեկանածուները պետք է բարեվարքության ստուգում անցնեն։
