Օկուպացված Արցախի Մարտունի քաղաքում ոչնչացվել է հայ պետական և ռազմական գործիչ, ազգային հերոս Գարեգին Նժդեհի հուշարձանը, ահազանգել է Արցախի մշակութային ժառանգության մշտադիտարկում իրականացնող Monumentwatch.org կայքը:
«Ադրբեջանում Կովկասի պատմության կենտրոնի տնօրեն Ռիզվան Հուսեյնովը 2025 թվականի մայիսի 17-ին իր տելեգրամյան ալիքում իր իսկ մեկնաբանությամբ ու մասնակցությամբ տեսանյութ է հրապարակել, որտեղ հայտնում է Գարեգի Նժդեհի հուշարձանի ոչնչացման մասին՝ ներկայացնելով հերոսին որպես ֆաշիստ, իսկ հուշարձանի ոչնչացումը որպես հերոսություն։ Հուսեյնովը նշում է նաև ՀՀ և Արցախի ազգային հերոս Մոնթե Մելքոնյանի հուշարձանի ոչնչացման մասին», – գրել է կայքը։
Նժդեհի հուշարձանը Մարտունիում քանդակվել էր քանդակագործ Արմեն Պետրոսյանի կողմից և տեղադրվել 2020 թվականի սեպտեմբերի 26-ին։ Մշտադիտարկում իրականացնող խումբը նշել է, որ արձանի ոչնչացումը «Զինված հակամարտությունների ժամանակ մշակութային արժեքների պաշտպանության մասին» Հաագայի 1954թ. կոնվենցիայի 4-րդ հոդվածի և լրացուցիչ՝ 1999թ. ընդունված Երկրորդ արձանագրության խախտում է։
Ռուսաստանի հայերի միությունը մարտի 20-ին դիմել էր ՌԴ քննչական կոմիտեին` նշելով, որ օկուպացված Արցախում Ադրբեջանի կողմից հայկական հուշարձանները ոչնչացնելու հիմքով պետք է քրեական գործ հարուցել։ Մայիսի 1-ին ՌԴ նախագահ Վլադիմիր Պուտինին ուղղված նամակում հայ հերոսների հուշարձանները ոչնչացնելու մասին նշել էր նաև Արցախի Հանրապետության անվտանգության խորհրդի նախկին քարտուղար Վիտալի Բալասանյանը։
