Իրանը թշնամիներին թույլ չի տա խաթարել Հայաստանի հետ իր ռազմավարական հարաբերությունները, Tasnim-ի փոխանցմամբ՝ Հայաստանի Անվտանգության խորհրդի քարտուղար Արմեն Գրիգորյանի հետ հանդիպմանը հայտարարել է Իրանի ազգային անվտանգության բարձրագույն խորհրդի քարտուղար Ալի Աքբար Ահմադիանը:
Թեհրանում կայացած հանդիպմանը Ահմադիանը նշել է, որ Իրանի և Հայաստանի միջև ռազմավարական հարաբերությունները ու սերտ համագործակցությունը բոլոր ոլորտներում կնպաստեն տարածաշրջանային խաղաղությանն ու կայունությանը: Ընդգծելով բոլոր հարևանների հետ սերտ կապեր պահպանելու Իրանի քաղաքականությունը՝ Ահմադիանը շեշտել է, որ կողմնակի անձինք շահագրգռված չեն տարածաշրջանային խաղաղությամբ:
«Իրանը թույլ չի տա թշնամիներին որևէ վնաս հասցնել երկու հարևանների միջև լավ հարաբերություններին»,- հավելել է նա:
Իրանցի պաշտոնյան նաև ընդգծել է Թեհրանի և Երևանի միջև համատեղ նախագծերի լիարժեք իրականացման անհրաժեշտությունը: Գրիգորյանն իր հերթին նշել է, որ Հայաստանի և Իրանի միջև հարաբերությունների ընդլայնումը կախված չէ ուրիշների կամքից: ՀՀ ԱԽ քարտուղարը նաև բարձր է գնահատել իրանական մասնավոր հատվածի գործընկերությունը Հայաստանում տնտեսական և էներգետիկ նախագծերում:
Ավելի ուշ ԱԽ քարտուղարի գրասենյակից հայտնել են, որ Թեհրանում Արմեն Գրիգորյանը ԻԻՀ գերագույն առաջնորդի խորհրդական, Արտաքին հարաբերությունների ռազմավարական խորհրդի ղեկավար Քամալ Խարազիի հետ հանդիպմանն անդրադարձել է տարածաշրջանի հաղորդակցման ուղիների ապաշրջափակմանը և ընդգծել ՀՀ կառավարության կողմից առաջ քաշված «Խաղաղության խաչմերուկ» նախագծի կարևորությունը:
Մայիսի 16-ին Գրիգորյանն աշխատանքային այցով մեկնել էր Իրան` մասնակցելու «Թեհրանի երկխոսություն ֆորում 2025»-ին։ Մայիսի 17-ին Իրանի արտաքին գործերի նախարար Աբբաս Արաղչին ՀՀ ԱԽ քարտուղարի հետ հանդիպմանը կոչ էր արել շուտափույթ կնքել Հայաստանի և Ադրբեջանի միջև խաղաղության պայմանագիրը։
