Խաղաղության համաձայնագրի նախագծում լուծվում են Հայաստանում և Ադրբեջանում բարձրացվող հարցերը, ադրբեջանական լրատվամիջոցին տված հարցազրույցում հայտարարել է վարչապետ Նիկոլ Փաշինյանը:
Ադրբեջանցի լրագրողի հարցին, թե արդյոք նոր Սահմանադրության տեքստում լինելո՞ւ է հղում Անկախության հռչակագրին, որտեղ խոսվում է Արցախը Հայաստանին միավորելու անհրաժեշտության մասին, Փաշինյանը պատասխանել է, որ մայր օրենքի տեքստը դեռ պատրաստ չէ, սակայն հավելել է, որ գործող օրենքում հարևանների նկատմամբ տարածքային պահանջներ չկան: Բացի այդ, վարչապետը հիշեցրել է, որ Երևանն ու Բաքուն ճանաչել են միմյանց տարածքային ամբողջականությունն Ալմա-Աթայի հռչակագրի հիման վրա:
«Ադրբեջանական կողմը հարցեր է բարձրացնում, թե իբր Հայաստանի սահմանադրության մեջ տարածքային պահանջներ կան Ադրբեջանի դեմ։ Եթե այդ մտահոգություններն անկեղծ են, ապա հարցի լուծման ամենակարճ ճանապարհը խաղաղության համաձայնագրի ստորագրումն է։ Երբ խաղաղության համաձայնագիրը ստորագրվի և վավերացվի Հայաստանի խորհրդարանում, արդեն օրենսդրական ամենաբարձր մակարդակով կարձանագրվի, որ Հայաստանը ոչ մի տարածքային պահանջ չունի Ադրբեջանի և, ընդհանրապես, հարևանների նկատմամբ»,- հայտարարել է վարչապետը։
Նա հավելել է՝ խաղաղության պայմանագրի՝ երկրի հիմնական օրենքին համապատասխանության հարցը կարող է որոշել միայն տվյալ երկրի Սահմանադրական դատարանը պայմանագրի ստորագրումից հետո:
Ադրբեջանը երկար ժամանակ Հայաստանից պահանջում է փոխել Սահմանադրությունը՝ այնտեղ «տարածքային պահանջներ» տեսնելով: Պաշտոնական Երևանը, մինչդեռ, բազմիցս է հայտարարել, որ նման բան գոյություն չունի: Ապրիլի 16-ին Փաշինյանը հայտարարել էր, որ իր կարծիքով՝ նոր Սահմանադրության տեքստում չպետք է հղում լինի Անկախության հռչակագրին:
Ադրբեջանը մարտի 13-ին հայտարարել էր Հայաստանի հետ խաղաղության պայմանագրի տեքստի համաձայնեցման մասին, երբ Երևանն, ըստ Բաքվի, ընդունել էր պայմանագրի երկու չհամաձայնեցված կետի վերաբերյալ առաջարկները՝ միմյանց դեմ միջազգային դատարաններում փոխադարձ հայցերից հրաժարվելու և երրորդ երկրների ներկայացուցիչների ներկայությունը Հայաստանի և Ադրբեջանի սահմանին չթույլատրելու մասին։
Հայաստանի ԱԳՆ-ն նույն օրը հաստատել էր այդ տեղեկատվությունը և հայտնել, որ պատրաստ է քննարկել փաստաթղթի ստորագրման ժամանակը և վայրը։ Ադրբեջանի նախագահ Իլհամ Ալիևը խաղաղության պայմանագրի տեքստի համաձայնեցման մասին հայտարարությունից հետո նշել էր, որ Բաքվի վստահության մակարդակը Երևանի նկատմամբ «մոտ է զրոյին»։
