Հայաստանի նոր Սահմանադրության տեքստը մշակման փուլում է և պատրաստ կլինի 10 ամսվա ընթացքում, խորհրդարանում ճեպազրույցի ժամանակ հայտարարել է ՀՀ արդարադատության նախարար Սրբուհի Գալյանը։
Նա մեկնաբանել է Անկախության հռչակագիրը Սահմանադրության նոր տեքստից հանելու մասին հարցը՝ նշելով, որ «տարբերակներ են քննարկում»։
«Տեքստը դեռ մշակման փուլում է։ Հայեցակարգը մեկն է և այդ հայեցակարգի հետ, տարբեր նորմերի հետ կապված, կան քննարկումներ»,- նշել է նախարարը։
Գալյանը պարզաբանել է, որ Սահմանադրության փոփոխության հարցը հանրաքվեի դնելու ժամկետները դեռևս չեն քննարկվել։
«Երբ տեքստը պատրաստ լինի, մենք հայեցակարգային առանձին դրույթներ, իհարկե, հանրության դատին կհանձնենք և շատ մանրամասն կքննարկենք, թե ինչի մասին է խոսքը»,- ընդգծել է նախարարը։
Նրա խոսքով՝ ընդդիմության ներկայացուցիչները չեն մասնակցում Սահմանադրության փոփոխությունների վերաբերյալ քննարկումներին։
Հուլիսի 20-ին Ադրբեջանի նախագահ Իլհամ Ալիևը հայտարարել էր, որ Հայաստանի հետ խաղաղության պայմանագրի տեքստի 80-90 տոկոսն արդեն համաձայնեցված է։ Նա ընդգծել էր, որ Երևանը պետք է արձագանքի համաձայնագրի վերաբերյալ Բաքվի առաջարկներին և համատեղ դիմի ԵԱՀԿ-ին՝ Մինսկի խումբը լուծարելու համար։
Հունիսի 6-ին Ալիևն անդրադարձել էր խաղաղության պայմանագրին՝ նշելով, որ անհնար է այն կնքել, եթե Հայաստանի սահմանադրությունը չփոխվի։
