Երևանի Նոր Նորք վարչական շրջանի ղեկավար Տիգրան Տեր-Մարգարյանին մեղադրանք է առաջադրվել թաղապետարանում տեղի ունեցած դեպքի առթիվ քրեական վարույթի շրջանակներում, գրել է Armtimes-ը՝ հղում անելով իր աղբյուրներին:
Քննչական կոմիտեն, սակայն, սա չի հաստատել. կառույցի խոսնակ Կիմա Ավդալյանը միայն հայտնել է, որ քրեական վարույթի շրջանակներում հանրային քրեական հետապնդում է հարուցվել 4 անձի նկատմամբ՝ Քրեական օրենսգրքի 195-րդ հոդվածի 2-րդ 5-րդ կետով (մի խումբ անձանց կողմից ֆիզիկական ներգործությունը):
Մեղադրյալների ինքնությունը չի հրապարակվում:
Ակտիվիստ Արթուր Չախոյանին ևս մեղադրանք է առաջադրվել, տեղեկացրել է ինքը՝ Չախոյանը:
Բացի այդ, ՔԿ խոսնակը տեղեկացրել է, որ ապրիլի 29-ին Նոր Նորք վարչական շրջանի ղեկավարի աշխատակազմի վարչական շենքում տեղի ունեցած դեպքի առթիվ նախաձեռնված քրեական վարույթի շրջանակներում հանրային քրեական հետապնդում է հարուցվել երկու անձի նկատմամբ Քրեական օրենսգրքի 297-րդ հոդվածի 2-րդ մասի 1-ին և 3-րդ կետերով (խուլիագանությունը, որը կատարվել է մի խումբ անձանց կողմից տեղեկատվական կամ հաղորդակցական տեխնոլոգիաներն օգտագործելով)։
Ապրիլի 30-ին Նոր Նորքի թաղապետարանում ծեծռտուք էր տեղի ունեցել վարչական շրջանի ղեկավարի, իր աջակիցների և Չախոյանի միջև, որից հետո վերջինիս ոստիկանությունից վնասվածքներով տեղափոխել էին հիվանդանոց, այնուհետ մեղադրանք առաջադրել։
ՆԳՆ-ից ապրիլի 30-ին Armenia Today-ին տեղեկացրել էին, որ միջադեպի առնչությամբ 6 ձերբակալված կա։ Ավելի ուշ ՔԿ-ն հայտնել էր, որ դեպքի առթիվ քրեական վարույթ է նախաձեռնվել։ Չախոյանն ապրիլի 29-ին գրել էր, որ գնալու է թաղապետարան՝ հանրային քննարկմանը մասնակցելու նպատակով:
