ՀՀ-ում Եվրամիության դիտորդական առաքելությունը հեռացրել է Հայոց ցեղասպանության 110-րդ տարելիցին նվիրված՝ Ցեղասպանություն բառը պարունակող գրառումը և այն փոխարինել նոր գրառմամբ, գրում է News.am-ը: Կայքը հրապարակել է առաքելության նախորդ՝ ջնջված գրառման screenshot-ը։
Նոր գրառման մեջ ԵՄ-ն Ցեղասպանություն բառը փոխարինել է «վայրագություններ»-ով։
«Ապրիլի 24-ին հարգանքի տուրք ենք մատուցում 1915-1923թթ. հայ զոհերի հիշատակին։ Մենք պետք է ամեն ինչ անենք, որպեսզի կանխենք վայրագությունների կրկնությունը»,- ասված է երկրորդ գրառման մեջ։
Նշենք, որ նոր գրառման տակ օգտատերերը քննադատական մեկնաբանություններ են արել։
Ապրիլի 24-ին լրանում է Օսմանյան կայսրության կողմից 1915 թվականին հայերի նկատմամբ իրականացված Ցեղասպանության 110-րդ տարելիցը։ Աշխարհասփյուռ հայությունը ոգեկոչման միջոցառումներով կհիշի 1,5 միլիոն անմեղ զոհերի հիշատակը։ Հայոց ցեղասպանությունը պաշտոնապես ճանաչել է 34 պետություն, ավելի քան 70 կազմակերպություն։ 110 տարի անց Թուրքիան շարունակում է ժխտել Մեծ եղեռնի իրողությունը և պայքարում է Ցեղասպանության միջազգային ճանաչման դեմ՝ նենգափոխելով պատմությունը։ Մարտին Հայաստանի վարչապետ Նիկոլ Փաշինյանը թուրքական լրատվամիջոցներին տված հարցազրույցում հայտարարել էր, որ Հայոց ցեղասպանության միջազգային ճանաչումը պաշտոնական Երևանի արտաքին քաղաքական առաջնահերթություններից չէ։
