Ամենայն Հայոց կաթողիկոս Գարեգին 2-րդն ապրիլի 7-ի՝ Սուրբ Աստվածածնի ավետման օրն իր օրհնությունն ու բարեմաղթանքներն է հղել հայ ժողովրդին, մասնավորապես՝ կանանց և աղջիկներին։
«Հոգենորոգ այս օրը մեր եկեղեցիներում կատարվում է մայրության բերկրանքին սպասող կանանց օրհնություն` աղոթքով, որ ազգս զորանա նոր մանուկների ծնունդով, և մեր զավակներն Աստծո օրհնության ու իրենց ծնողների հոգածության ներքո մեծանան հավատավոր հոգով, հայրենյաց սիրով և դաստիարակվեն ազգային ինքնության արժեքներով։ Թող Սուրբ Աստվածածինը մեր մայրերի ու քույրերի համար շարունակի լինել ներշնչանք առ Աստված հույսի և ամենայն առաքինությունների, որոնցով բարեզարդված իրենց հոգածությունն ու նվիրումը բերեն ընտանիքներում և եկեղեցական, ազգային ու հայրենական մեր կյանքում»,- ասել է կաթողիկոսը։
Գարեգին 2-րդ հայցել է Սուրբ Աստվածածնի բարեխոսությունը Միածին Որդու առջև, որպեսզի Տերը խաղաղ, անխռով, բարօր պահի և պահպանի հայրենի երկիրն ու համայն ժողովրդին, օրհնի հայրենաշեն ու ազգաշահ բոլոր ջանքերը։
Ապրիլի 7-ը, ըստ Հայ առաքելական եկեղեցու տոնացույցի, Սուրբ Աստվածածնի ավետման օրն է և նշվում է որպես Մայրության և գեղեցկության տոն։
Տես նաև Armenia Today-ի հարցումը՝ «Լավ ընտանիք», «սիրել և սիրված լինել», «խաղաղություն». ո՞րն է հայ կանանց երջանիկ լինելու գրավականը
