Երևանում տեղի կունենա սիմֆոնիկ ռոք համերգ․ հասույթը կուղղվի երեխաների բուժմանը

Կարեն Դեմիրճյանի անվան մարզահամերգային համալիրում ապրիլի 15-ին՝ ժամը 19:30-ին, Հայաստանի պետական սիմֆոնիկ նվագախմբի մասնակցությամբ տեղի կունենա «Սիմֆոնիկ ռոք՝ հանուն երեխաների առողջության» բարեգործական համերգը, տեղեկացրել են Հայաստանի պետական սիմֆոնիկ նվագախմբից։

Համերգի կազմակերպիչը «Հայաստանի երեխաների առողջության հիմնադրամն» է, ամբողջ հասույթը կուղղվի ծանր հիվանդություններ ունեցող երեխաների բուժմանը։

Տոմսերի արժեքը 5000-20 000 դրամ է։ Համերգը կղեկավարի դիրիժոր Հարություն Արզումանյանը, մենակատարը Վարդան Գաբոյանն է (կիթառ):

Համերգի ծրագրում ներառված են The Beatles-ի, Queen-ի, Pink Floyd-ի, Deep Purple-ի, Scorpions-ի, Led Zeppelin-ի, System of a Down և այլ հայտնի խմբերի ու երաժիշտների ստեղծագործություններ։