Թուրքիայի և Ադրբեջանի հետ Հայաստանի սահմանների բացումը 30 տարի անց կարող է արմատապես փոխել իրավիճակը, Եվրամիության առաջնորդների և Կենտրոնական Ասիայի 5 երկրի մասնակցությամբ գագաթնաժողովում հայտարարել է Եվրահանձնաժողովի նախագահ Ուրսուլա ֆոն դեր Լայենը։
«Սահմանների բացումն ավելի կմոտեցնի Եվրոպան և Կենտրոնական Ասիան, քան երբևէ»,- նշել է Լայենը։
Հայաստան-Թուրքիա հարաբերությունների կարգավորման հարցով հատուկ բանագնաց, ԱԺ փոխխոսնակ Ռուբեն Ռուբինյանը մարտի 12-ին հայտարարել էր, որ Հայաստանն ամբողջովին պատրաստ է Թուրքիայի հետ հարաբերությունների կարգավորմանը, որը ներառում է նաև ՀՀ ցամաքային սահմանի ապաշրջափակում։
ՀՀ կառավարությունը մարտի 20-ի նիստում որոշում էր կայացրել մարտի 21-31-ը հայ-թուրքական սահմանի «Մարգարա» սահմանային անցակետը բացելու վերաբերյալ՝ Թուրքիայի տարածքով ցամաքային ճանապարհով Սիրիա մարդասիրական օգնություն տեղափոխելու նպատակով: Սիրիային ուղարկված մարդասիրական բեռը ներառում էր սնունդ և բժշկական պարագաներ։
