«Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանը Երևանի քաղաքապետարանի գործակարգավարական նիստին հայտնել է մայրաքաղաքում սանիտարական էտի և սանիտարական աշխատանքների մեկնարկի մասին։
Նրա խոսքով՝ միայն Թումանյան փողոցում 80 ծառ հեռացվել է, փոխարենը տնկվել է 95-ը, բացվել է 34 բնաբաժակ, որոնք տնտեսվարողների տարբեր աշխատանքների հետևանքով փակվել էին։ Թումանյան փողոցում 60 ծառ ավել կլինի նախկինից, շեշտել է Բեգոյանը։
«Ձմեռվա ընթացքում իրականացվել է մշտադալարների տունկ, ինչը նպատակահարմար է ցուրտ ժամանակահատվածում։ Արդյունքում՝ տնկվել է 250 մշտադալար հասուն ծառատեսակ՝ հիմնականում սոճիներ և եղևնիներ»,- ասել է նա։
Նրա խոսքով՝ տունկի աշխատանքները քաղաքում սկսել են իրականացնել փետրվարի երկրորդ կեսին, սանիտարական էտինը՝ մարտի 10-ից և դրանք վերաբերում են հիմնականում ավտոբուսային երթևեկությանը խոչընդոտող ծառերին։
ՀՈԱԿ-ի ղեկավարի խոսքով՝ էտի աշխատանքները պետք է տևեին մինչև ապրիլի 10-ը, սակայն եղանակի կտրուկ տաքացման ֆոնին՝ դրանք մայրաքաղաքի հարավային հատվածքներում կարող են ապրիլի 1-ին ավարտվել։
Հիշեցնենք, որ Երևանի քաղաքապետարանը 2023 թվականի գարնանը Կասկադում՝ Թամանյանի արձանի հարակից տարածքում, ծառերի զանգվածային հատման աշխատանքներ էր իրականացել։ Գերատեսչության որոշմամբ՝ տարածքի գրեթե բոլոր ծառերը կտրվել էին, հանվել դրանց արմատները։ Իսկ փոխարենը նույն հորերում տնկվել էին նոր՝ սակուրա ռոյալ տեսակի ծառեր։ Հատման աշխատանքները դժգոհության առիթ են դարձել Կենտրոն վարչական շրջանի բնակիչների, հասարակական գործիչների ու էկոլոգների շրջանում:
Մանրամասները՝ տեսանյութում։
