ՀՀ հակակոռուպցիոն կոմիտեն մեղադրանք է առաջադրել ՊՆ N զորամասի հրամանատար Տ. Մ.-ին խմբի կազմում 2 մլն դրամ արժողությամբ գույք հափշտակելու համար, հայտնում է ՀՀ հակակոռուպցիոն կոմիտեի մամուլի ծառայությունը։
Ըստ մեղադրանքի՝ Տ. Մ.-ն հանձնարարել է զորամասի ավտոմոբիլային ջոկի վարորդ Գ. Դ.-ին և պահեստապետ Կ. Ա.-ին պահեստից հանել ընդհանուր 10 տոննա դյուրալյումինից պատրաստված զրահատեխնիկայի շարժիչի՝ օգտագործման համար ոչ պիտանի պահեստամասերն ու վաճառել:
Նշվում է, որ Գ. Դ.-ն և Կ. Ա.-ն զրահատեխնիկայի շարժիչի՝ օգտագործման համար ոչ պիտանի պահեստամասերը բարձել են զորամասին ամրակցված բեռնատարը և 2024 թվականի փետրվարի 2-ից մայիսի 3-ն ընկած ժամանակահատվածում տեղափոխել Կոտայքի մարզի բնակավայրերից մեկը:
«Գ․Դ․-ն, հիշյալ պահեստամասերը վաճառելու՝ Տ. Մ.-ի ապօրինի հանձնարարությունը կատարելու նպատակով, պայմանավորվածություն է ձեռք բերել մետաղի ջարդոն ընդունող անձի հետ և հափշտակված պահեստամասերը՝ մեկ կիլոգրամը 400 դրամով, վաճառել նրան»,- ասվում է հաղորդագրության մեջ:
Ըստ կոմիտեի՝ ստացված 4 մլն դրամից 3 մլն դրամը Գ. Դ.-ն տվել է Տ. Մ.-ին, իսկ գումարի մնացած մասը՝ 1 մլն դրամը, տնօրինել են ինքն ու պահեստապետ Կ. Ա.-ն: Վերջիններիս կողմից հիշյալ 1 մլն դրամը նախաքննության ընթացքում ամբողջությամբ վերականգնվել է:
Տ. Մ.-ին մեղադրանք է առաջադրվել ՀՀ քրեական օրենսգրքի 256-րդ հոդվածի 2-րդ մասի 2-րդ և 3-րդ կետերով (վստահված խոշոր չափով գույքը հափշտակելը, առավելագույն պատիժը՝ 8 տարվա ազատազրկում) և 445-րդ հոդվածի 1-ին մասով (պաշտոնատար անձի կողմից կեղծ տեղեկություն մուտքագրելը, առավելագույն պատիժը՝ երկու տարվա ազատազրկում), Գ. Դ.-ին՝ 46-256-րդ հոդվածի 2-րդ մասի 2-րդ և 3-րդ կետերով, իսկ Կ. Ա.-ին՝ 46-256-րդ հոդվածի 2-րդ մասի 2-րդ և 3-րդ կետերով:
