Երևանը պաշտոնական նոտայով դիմել է Մինսկին՝ Բելառուսում բլոգեր Բելլա Բաբախանյանի կալանավորման առնչությամբ, խորհրդարանում հայտարարել է ՀՀ արտգործնախարար Արարատ Միրզոյանը։
Նա հայտնել է, որ փետրվարի 20-ին ԱԳՆ-ն պաշտոնական նոտա է հղել բելառուսական կողմին՝ հայցելով տեղեկություններ տրամադրել Հայաստանի քաղաքացու վերաբերյալ։ Նրա խոսքով՝ երեք օր անց պատասխան է ստացվել, ըստ որի՝ Բաբախանյանը 15 օրով զրկվել է ազատությունից և ժամկետը լրանալուց հետո ազատ կարձակվի։
«Ո՞վ է ջանքեր գործադրել բաց թողնելու համար, ո՞վ է դա ներկայացնում որպես իր ձեռքբերում, չգիտեմ։ Մեզ այդքան չի հետաքրքրում: Մենք հավաստիացել ենք, որ մեր քաղաքացին 15 օրից հետո բաց է թողնվելու»,- ասել է Միրզոյանը։
Նա նաև հայտարարել է, որ Բելառուսի հետ հարաբերությունները վատթարացրել է ոչ թե հայկական կողմը, այլ «այն մարդիկ, ովքեր պաշտոնապես և հրապարակավ ընդունել են, որ Բելառուսն օգնություն է ցուցաբերել Ադրբեջանին, այդ թվում՝ ռազմական՝ Լեռնային Ղարաբաղի դեմ հարձակման ընթացքում»։ Միրզոյանը հավելել է, որ այդ անձինք Բելառուսի ներկայացուցիչներ են։
Փետրվարի 14-ին բլոգեր Ալեքսանդր Լապշինը հայտնել էր Բաբախանյանի ձերբակալության մասին։ Ավելի ուշ գործարար Գագիկ Ծառուկյանի մամուլի քարտուղար Իվետա Տոնոյանը հայտնել էր, որ Ծառուկյանն «իր պարտքն է համարել օգտագործել բոլոր հնարավոր և մատչելի մեթոդները, դիվանագիտական ուղիները, անձնական և մարդկային կապերը»՝ տեղում բլոգերին «իրավական և այլ օգնություն» կազմակերպելու համար։ Փետրվարի 25-ին Տոնոյանը հայտնել էր Բաբախանյանի՝ Հայաստան վերադարձի մասին։
Մանրամասները՝ տեսանյութում։
