Երուսաղեմի հայոց պատրիարք Նուրհան արքեպիսկոպոս Մանուկյանն Իսրայելի վարչապետ Բենյամին Նեթանյահուին նամակով կոչ է արել կանխել Երուսաղեմի քաղաքապետարանի գործողությունները, որոնցով փորձում են առգրավել, այնուհետև աճուրդով վաճառել Երուսաղեմի հայկական քրիստոնեական պատրիարքարանին դարեր շարունակ պատկանող անշարժ գույքը, հայտնել է Հայոց պատրիարքարանի դիվանապետ Աղան Գոգչյանը:
«Նամակում պատրիարք հայրը վարչապետին հորդորել է միջամտել և դադարեցնել պատրիարքության դեմ ձեռնարկած քաղաքապետարանի գործողությունները և վերսկսել իր կողմից նշանակված կառավարական հանձնախմբի հանդիպումները՝ խնդրին լուծում գտնելու համար»,- մանրամասնել է Գոգչյանը:
Փետրվարի 19-ին Երուսաղեմի Հայոց պատրիարքությունը տեղեկացրել էր, որ 1994 թվականի մունիցիպալ հարկի ենթադրյալ պարտքի պատճառով Երուսաղեմի քաղաքապետարանը փորձում է առգրավել և աճուրդով վաճառել պատրիարքությանը դարեր շարունակ պատկանող անշարժ գույքը։ Պատրիարքարանից նշել էին, որ պարտքը կամայականորեն պարտադրվել է քաղաքային պաշտոնյայի կողմից՝ առանց պատշաճ դատավարության: Միևնույն ժամանակ հավելել էին, որ Երուսաղեմի քաղաքապետարանն ինքը չվճարված վարձավճարների տեսքով միլիոնավոր դոլարներ է պարտք պատրիարքարանին:
2023 թվականի հունվարին Երուսաղեմում հրեա արմատականները հարձակվել էին հայերի վրա և փորձել պոկել Հայ առաքելական եկեղեցու Երուսաղեմի պատրիարքարանի շենքի դրոշները։ Նույն տարվա հունվարի 27-ին հրեա ծայրահեղականները սադրել էին Երուսաղեմի Taboon Wine Bar հայկական ռեստորանի աշխատակիցներին ու այցելուներին։
Միաժամանակ, շարունակվել էր նաև դիմակայությունը Երուսաղեմի հայկական թաղամասի «Կովերի պարտեզ» տեղամասի շուրջ։ 2023 թվականի դեկտեմբերի 28-ին շուրջ 30 սադրիչ հարձակվել էր «Կովերի պարտեզում» գտնվող հայերի վրա։ Երուսաղեմի Հայոց պատրիարքարանը հայտարարել էր, որ նրանք ղեկավարվում են տարածքի նկատմամբ հավակնություններ ունեցող Xana Capital ընկերության կողմից։ Հարձակման հետևանքով վիրավորվել էին հոգևորականներ, հայկական աստվածաբանական ակադեմիայի ուսանողներ և տեղի բնակիչներ: 2024-ի ապրիլի 3-ին մի խումբ հրեա վերաբնակիչներ՝ ավելի քան 20 իսրայելցի ոստիկանի ուղեկցությամբ, ներխուժել էին այդ տարածք։
2024-ի սեպտեմբերին Xana Gardens ընկերությունը, որը հավակնում է Երուսաղեմի Հին քաղաքի հայկական թաղամասի «Կովերի պարտեզ» հողամասին, հայց էր ներկայացրել թաղամասի փրկության շարժման համահիմնադիրներ Հակոբ Ջերնազյանի և Սեթրագ Բալյանի դեմ։
