Փարիզում եվրոպական երկրների առաջնորդներն Ուկրաինայի հակամարտության հարցով արտակարգ գագաթնաժողով են անցկացրել, հայտնել է BBC-ն։
Նրանք քննարկել են, թե ի՞նչպես վարվել ԱՄՆ նախագահ Դոնալդ Թրամփի վարչակազմի հայտարարություններից հետո, ըստ որի ԱՄՆ-ն Մոսկվայի հետ առանց Եվրոպայի մասնակցության պետք է բանակցություններ վարի:
Փարիզում կայացած հանդիպման արդյունքների մասին չի հաղորդվել, սակայն ԵՄ-ն և ՆԱՏՕ-ն հայտարարել են պաշտպանության ոլորտում ավելի շատ ներդրումներ կատարելու անհրաժեշտության, ինչպես նաև Կիևին անվտանգության հուսալի երաշխիքներ տրամադրելու մասին:
Բանակցություններին մասնակցել են Ֆրանսիայի, Մեծ Բրիտանիայի, Գերմանիայի, Իտալիայի, Իսպանիայի, Դանիայի, Լեհաստանի, Նիդերլանդների առաջնորդները, ինչպես նաև ՆԱՏՕ-ի և Եվրամիության ղեկավարները:
«Եվրոպան պատրաստ է և ցանկանում է քայլ առաջ կատարել, Ուկրաինայի համար անվտանգության երաշխիքներ տրամադրել։ Պատրաստ ենք ավելի շատ միջոցներ ներդնել անվտանգության ոլորտում»,- հայտարարել ՆԱՏՕ-ի գլխավոր քարտուղար Մարկ Ռյուտեն։
Գագաթնաժողովից հետո Ֆրանսիայի նախագահ Էմանուել Մակրոնը հայտարարել է, որ եվրոպացիները պետք է «ավելի լավ ու ավելի մեծ» ներդրումներ կատարեն պաշտպանության ոլորտում։
«Եվրոպացիները ցանկանում են արագացնել ինքնիշխանության, անվտանգության և մրցունակության ապահովման իրենց սեփական ծրագրի իրականացումը։ Աշխատանքը կշարունակվի Եվրահանձնաժողովի առաջարկների հիման վրա՝ ինչպես Ուկրաինային աջակցելու, այնպես էլ մեր պաշտպանության մեջ ներդրումներ կատարելու համար»,- հայտարարել է Մակրոնը։
Ֆրանսիայի նախագահը նաև հայտնել է, որ Փարիզում տեղի ուենցած հանդիպումից հետո հեռախոսազրույց է ունեցել ԱՄՆ և Ուկրաինայի նախագահների հետ: Թրամփը և Ֆրանսիայի առաջնորդը հեռախոսազրույցի ընթացքում քննարկել են Ուկրաինայում տիրող իրավիճակը, ինչպես նաև Սաուդյան Արաբիայում ռուսական և ամերիկյան պատվիրակությունների առաջիկա բանակցությունները:
«Մենք ձգտում ենք կայուն և երկարատև խաղաղության Ուկրաինայում, ուստի Ռուսաստանը պետք է դադարեցնի իր ագրեսիան, և դա պետք է ուղեկցվի ուկրաինացիների համար անվտանգության ուժեղ և հուսալի երաշխիքներով»,- հավելել է Ֆրանսիայի նախագահը։
Մակրոնը խոստացել է առաջիկա օրերին շարունակել Ուկրաինայի հարցով քննարկումը։
Փետրվարի 15-ին Սաուդյան Արաբիան պատրաստակամություն էր հայտնել երկրում ընդունել Ռուսաստանի և ԱՄՆ նախագահների հանդիպումը։ Թրամփն ու ՌԴ նախագահ Վլադիմիր Պուտինը հեռախոսազրույց էին ունեցել նաև փետրվարի 12-ին։ Զրույցից հետո Թրամփը հայտնել էր, որ Պուտինի հետ պայմանավորվել է բանակցային գործընթաց սկսել Ուկրաինայում հակամարտությունը դադարեցնելու համար։
Փետրվարի 16-ին ԱՄՆ պատվիրակությունը մեկնել էր Սաուդյան Արաբիա՝ ՌԴ ներկայացուցիչների հետ բանակցությունների նպատակով։
Փետրվարի 18-ին Սաուդյան Արաբիայի մայրաքաղաք Էր Ռիադում մեկնարկել են Ուկրաինայի հարցով Ռուսաստանի և ԱՄՆ պատվիրակությունների բանակցությունները։
