Վլադիկավկազցի գործարար Օլեգ Գուսովի մահվան փաստով հարուցված քրեական գործը, որը, ըստ նրա հարազատների, մահացել էր «Ջերմուկ» հանքային ջուր խմելուց հետո, կասեցվել է, «ՌԻԱ Նովոստի»-ին հայտնել է մահացածի ընտանիքի փաստաբան Հայրատ Հիքմատուլինը:
«Քրեական գործը կասեցվել է։ Որքանով մեզ հայտնի է, դեռ անցյալ տարվա մայիսին հետաքննությունը հարցումներ է ուղարկել Հայաստան, սակայն պատասխանողն անտեսում է հարցումները»,- ասել է փաստաբանը։
Նրա խոսքով՝ մահացածի հարազատները գործի կասեցումից հետո փոխհատուցման հայց են նախապատրաստել։
«Պետք է հասկանալ, թե որքա՞ն գումար է ծախսվել տուժածին Վլադիկավկազից Մոսկվա տեղափոխելու, ինչպես նաև Սկլիֆոսովսկու գիտահետազոտական ինստիտուտում բուժման համար։ Բայց ընտանիքին, առաջին հերթին, ոչ թե գումար, այլ արդարություն է պետք»,- հավելել է փաստաբանը։
2024-ի փետրվարի 13-ին «Ռոսպոտրեբնադզորը» կասեցրել էր Հայաստանում արտադրված «Ջերմուկ» հանքային ջրի մի քանի խմբաքանակների վաճառքը՝ Վլադիկավկազի բնակչի կերակրափողի այրվածք ստանալու մասին հաղորդումից հետո։ ՌԴ Քննչական կոմիտեի Հյուսիսային Օսիայի քննչական վարչությունում դեպքի առթիվ քրեական գործ էր հարուցվել։
«Ջերմուկ գրուպը»-ը 2024-ին Armenia Today-ի հարցմանն ի պատասխան բացառել էր գործարանում շշալցված «Ջերմուկի» շշի մեջ քացախաթթվի առկայությունը՝ ընդգծելով, որ հանքային ջրի արտադրության մեջ քացախաթթու ընդհանրապես չի օգտագործվում։
Նախորդ տարվա փետրվարի 23-ին ՀՀ ՍԱՏՄ-ն «անհիմն» և «տարակուսելի» էր որակել «Ռոսպոտրեբնադզորի»՝ ՌԴ-ում 2,5 միլիոն շիշ «Ջերմուկի» իրացումը կասեցնելու մասին որոշումը՝ հայտարարելով, որ «Ջերմուկի» պարունակության մեջ չի կարող քացախ լինել:
2025-ի հունվարի 19-ին «Կոմերսանտը» գրել էր, որ Գուսովի ընտանիքը 1,5 մլրդ ռուբլի փոխհատուցելու պահանջով հայց է ներկայացրել «Ջերմուկ գրուպ» ՓԲԸ-ի դեմ։ Հայաստանի Էկոնոմիկայի նախարարությունից Armenia Today-ին 2025-ի հունվարի 20-ին հայտնել էին, որ ՀՀ սննդի անվտանգության տեսչական մարմինն անհրաժեշտ բոլոր փաստաթղթերն ու հիմնավորումները փոխանցել է ռուսական կողմին, որոնցով ապացուցվել է, որ հանքային ջուրը համապատասխանում է միջազգային ստանդարտներին։
2025-ի հունվարի 21-ին «Ջերմուկ Գրուպը» զրպարտություն էր որակել «Կոմերսանտի» հրապարակման մեջ տեղ գտած հայտարարությունները՝ հերքելով տեղեկությունը, թե Գուսովը «հանքային ջուրը խմելուց հետո է մահացել»։ Ընկերությունն անհիմն էր որակել Գուսովի ընտանիքի հայցը, որով որպես «վնասի փոխհատուցում» 1,5 մլրդ ռուբլի էին պահանջել։ Ընկերությունից հստակեցրել էին, որ Գուսովի մահվան առնչությամբ ՌԴ իրավապահների կողմից հարուցված քրեական վարույթում «Ջերմուկ Գրուպը» նույնիսկ վարույթին ներգրավված կողմ չէ։
