Ադրբեջանի պաշտպանության նախարարության հաղորդագրությունն այն մասին, թե փետրվարի 24-ին` ժամը 12:45-ի սահմաններում, Հայաստանի Հանրապետության ԶՈւ ստորաբաժանումներն իբր կրակ են բացել սահմանագոտու արևելյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը, հայտնում է ՀՀ ՊՆ մամուլի ծառայությունը:
Միևնույն ժամանակ, ՀՀ ՊՆ-ն հայտնում է, որ փետրվարի 24-ին՝ ժամը 12:30-ի սահմաններում, Ադրբեջանի ԶՈւ-ն կրակ է բացել Վերին Շորժայի (Գեղարքունիքի մարզ) հատվածում տեղակայված հայկական դիրքերի ուղղությամբ: «Կրակ է բացվել հետևյալ կոորդինատներում տեղակայված ադրբեջանական դիրքից՝ 40 °05’31.68″ N, 45 ° 52’51.44″ E»,- մանրամասնում է ՀՀ ՊՆ-ն:
Փետրվարի 23-ին ՀՀ ՊՆ-ն հերքել էր հայկական կողմից հրադադարը խախտելու մասին ադրբեջանական ՊՆ-ի տարածած հայտարարությունը:
ՀՀ վարչապետ Նիկոլ Փաշինյանը France 24-ի եթերում փետրվարի 22-ին հայտարարել էր, որ Ադրբեջանը նոր պատերազմի է պատրաստվում ու հավելել, որ Հայաստանի մասնակցությունը Հավաքական անվտանգության պայմանագրի կազմակերպությանը (ՀԱՊԿ) սառեցվել է։
ՀՀ ՊՆ-ն փետրվարի 13-ին հայտնել էր, որ սահմանին ադրբեջանական կողմի կրակի հետևանքով հայկական կողմն ունի 4 զոհ և 1 վիրավոր։ Գերատեսչությունը հրապարակել էր զոհված զինվորականների անունները։
