Ֆրանսիական Վալանս քաղաքում միջոցառումներ են սկսվել՝ ի հիշատակ հայազգի ֆրանսիական դիմադրության առաջնորդ Միսաք Մանուչյանի, ում աճյունը փետրվարին կվերահուղարկավորվի Փարիզի պանթեոնում, X-ում գրել է Վալանսի քաղաքապետ Նիկոլա Դարագոնը։
«Նրա վերահուղարկավորությունը Պանթեոնում աջակցելու նախաձեռնությունը Վալանսից էր: Դրոմ մայրաքաղաքը (դեպարտամենտը Ֆրանսիայի հարավ-արևելքում – խմբ.) մտադիր է հարգանքի տուրքը երկարաձգել տարբեր միջոցառումներով, որոնք կլինեն տարվա կարևորագույն իրադարձությունները», – գրում է Le Dauphin libere թերթը:
Պանթեոնացման արարողությունը տեղի կունենա 2024 թվականի փետրվարի 21-ին՝ Մանուշյանի և նրա համախոհների մահապատժի 80-րդ տարելիցին։ Նա կդառնա ոչ ֆրանսիական ազգությամբ առաջին մարդը, ում մոխիրը կվերահուղարկավորվի Պանթեոնում։
Մանուշյանը ծնվել է 1906 թվականին Արևմտյան Հայաստանի Ադիյաման քաղաքում։ Նրա ծնողները մահացել են 1915 թվականի Հայոց ցեղասպանության ժամանակ։ 1925 թվականին Մանուշյանը գաղթել է Ֆրանսիա և ապրել Մարսելում և Փարիզում։ Գերմանիայի կողմից Ֆրանսիայի օկուպացումից հետո կնոջ՝ Մելինեի հետ մասնակցել է ֆրանսիական դիմադրության շարժմանը։ Մանուշյանի հրամանատարությամբ գործող խումբը գրեթե 30 հաջող հարձակում է իրականացրել գերմանական օկուպանտների վրա։ Մանուշյանը ձերբակալվել է 1943 թվականի նոյեմբերին, իսկ 1944 թվականի փետրվարի 21-ին իր 21 ընկերների հետ մահապատժի է ենթարկվել։
Միսաք Մանուշյանի աճյունը Փարիզի պանթեոնում վերաթաղելու ամսաթիվը հայտնել էր Ֆրանսիայի մշակույթի նախարարության նախկին ղեկավար Ռիմա Աբդուլ-Մալակը՝ 2023 թվականի հոկտեմբերին։
