Թուրքիայի Սուպերգավաթի «Գալաթասարայ»-«Ֆեներբախչե» հանդիպումը, որը պետք է կայանար ուրբաթ օրը Սաուդյան Արաբիայի մայրաքաղաք Էր Ռիադում, չի կայանա, հայտնում է թուրքական Fanatik թերթը։
Հանդիպումը պետք է սկսվեր երեկ՝ 20:45-ին, սակայն թիմերը նույնիսկ մարզադաշտ չեն ժամանել։ Նշվում է, որ Սաուդյան Արաբիայի իշխանությունները թույլ չեն տվել խաղի ժամանակ օգտագործել Մուստաֆա Քեմալ Աթաթուրքի «Խաղաղություն տանը՝ խաղաղություն աշխարհում» կարգախոսով պաստառի օգտագործումը։ Բացի այդ, թիմերը ցանկանում էին խաղադաշտ դուրս գալ Աթաթուրքի պատկերով մարզաշապիկներով, որը նույնպես չի թույլատրվել։
AS-ի տեղեկություններով՝ օրվա ընթացքում կողմերը փորձել են համաձայնության գալ, որպեսզի խաղը կայանա։ Թուրքիայի ֆուտբոլի ֆեդերացիան ընդգծել է, որ խաղից առաջ կհնչի ազգային օրհներգը և կբացվի Թուրքիայի դրոշը։ Սպասվում էր, որ կլուծվի նաև թիմերի՝ մարզաշապիկներով և Աթաթուրքի նշանաբանով պաստառով խաղադաշտ դուրս գալու պահանջի հետ կապված իրավիճակը։ Բայց, ի վերջո, Սաուդյան Արաբիայի իշխանությունները մերժել են թիմերի պահանջը, և նրանք պարզապես չեն ներկայացել խաղին։
Թուրքական լրատվամիջոցները հայտնում են, որ խաղը հետաձգվել է անորոշ ժամանակով։
