ԱՄՆ կոնգրեսականները դատապարտել են Ադրբեջանի հարձակումը հայկական բնակավայրերի վրա։ Նրանք կոչ են արել ԱՄՆ-ին անհապաղ դադարեցնել բոլոր ռազմական օգնությունն Ադրբեջանին։
Ադրբեջանը հրետակոծել է Արցախում անմեղ խաղաղ բնակիչների տները և այժմ հարձակվում է Հայաստանի հետ սահմանի վրա, իր Twitter-ում գրել է ԱՄՆ կոնգրեսական Ադամ Շիֆը։
«Հրադադարի կոպտագույն խախտում և ուղղակի հարձակում Հայաստանի ինքնիշխանության վրա. Միացյալ Նահանգները պետք է անհապաղ և ընդմիշտ դադարեցնի Ադրբեջանին տրամադրվող բոլոր օգնությունները»,- ասել է Շիֆը։
Կոնգրեսական Ջեքի Սփայերը նույնպես անդրադարձել է հայկական խաղաղ բնակավայրերի գնդակոծություններին, ընդգծելով, որ Ադրբեջանը գնդակոծում է միջազգայնորեն ճանաչված հայկական քաղաքները։
«Ես վրդովված եմ այն լուրերից, որ Ադրբեջանը զանգվածային հրետանային կրակ է բացել հայկական խաղաղ քաղաքների ուղղությամբ։ Հասկանալի է, որ դրանք միջազգայնորեն ճանաչված հայկական քաղաքներ են, այլ ոչ վիճելի բնակավայրեր: Անարդար է, որ ԱՄՆ-ը շարունակում է ռազմական աջակցություն ցուցաբերել Ադրբեջանին»,- ասել է Սփայերը։
Կոնգրեսական Բոբ Մենենդեսն իր հերթին ասել է, որ հայկական քաղաքների և անմեղ բնակիչների գնդակոծությունն անընդունելի է և անօրինական։ «Աշխարհը պետք է դիմադրի ավտորիտար դաժանությանը։ ԱՄՆ-ը պետք է անհապաղ դադարեցնի անվտանգության ապահովմանն ուղղված ամբողջ աջակցությունը Ադրբեջանին»,- գրել է Մենենդեսը Twitter-ում։
Ֆրենկ Փալոնը ԱՄՆ պետքարտուղարությանը և պետքարտուղար Բլինքենին կոչ է արել աշխատել ԵԱՀԿ Մինսկի խմբի հետ՝ խաղաղություն ապահովելու համար, ինչպես նաև պահանջել է Ադրբեջանի նախագահ Իլհամ Ալիևից «դադարեցնել իրենց ագրեսիան»։
Ավելի վաղ Հայաստանի պաշտպանության նախարարությունը հայտնել էր, որ սեպտեմբերի 13-ի կեսգիշերից ադրբեջանական զինուժը հրետանու և անօդաչու թռչող սարքերի միջոցով գնդակոծում է հայկական դիրքերը Գորիսի, Սոթքի և Ջերմուկի ուղղությամբ։ Գերատեսչությունը հայտնել է նաև, որ հայկական կողմից կան զոհեր և վիրավորներ։ Հայաստանի կառավարությունն արդեն դիմել է Ռուսաստանի Դաշնությանը, ՄԱԿ-ի Անվտանգության խորհրդին և ՀԱՊԿ-ին՝ հանրապետության տարածքի դեմ Ադրբեջանի ագրեսիայի հետ կապված։
