Հուլիսի 9-10-ին Հայ գործարարների ասոցիացիան «Տաշիր» ընկերությունների խմբի աջակցությամբ Buissup նախագծի շրջանակում կանցկացնի իր առաջին Hackathon-ը:
Միջոցառման 35 անդադար ժամերի ընթացքում լավագույն գաղափարների շուրջ կձևավորվեն թիմեր, որոնք մենթորների օգնությամբ կստեղծեն իրենց նախագծերի ժամանակակից լուծումներով նախատիպերը (Prototype):
Hackathon-ը կանցկացվի միաժամանակ չորս քաղաքում՝ Երևանում, Կապանում, Գյումրիում և Վանաձորում: Մասնակիցներն իրենք կարող են ընտրել մասնակցության քաղաքը։
Մասնակցել կարող են ինչպես սեփական գաղափարով անհատներ, որոնք ուզում են իրենց թիմ ներգրավել տարբեր ոլորտների մասնագետների (ծրագրավորողների, մարկեթոլոգների, դիզայներների, ֆինանսիստների և այլն), այնպես էլ տարբեր ոլորտների մասնագիտացում ունեցող անձինք, որոնք ցանկանում են աշխատել որևէ գաղափարի շուրջ։ Կարող են դիմել նաև արդեն ձևավորված թիմեր՝ իրենց նախագծով։
Միջոցառումը կմեկնարկի հուլիսի 9-ին՝ առավոտյան ժամը 10:00-ին, և կավարտվի ամսի 10-ին՝ ժամը 21:00-ին:
Մրցույթի ավարտին լավագույնը ճանաչված թիմերը հնարավորություն կունենան մասնակցել Buissup Global Forum 2022-ին՝ շրջանցելով հայտադիմումների փուլը և պայքարել ներդրումների համար։
Մասնակցության հայտերն ընդունվում են մինչև հուլիսի 1-ը ներառյալ:
