Հունիսի 13-17-ը տեղի կունենա «Գիտության և գործարարության օրեր» միջոցառումը՝ մասնակցությամբ մոլեկուլային կենսաբան, նյարդաբան, բժշկության 2021թ. Նոբելյան մրցանակակիր, պրոֆեսոր Արդեմ Փաթափությանի, համաշխարհային ճանաչում ունեցող հայազգի գիտնականներ Ռուբեն Ենիկոլոպովի, Գեորգի Դերլուգյանի, Գարիկ Իսրայելյանի, Դավիթ Բաղդասարյանի, Երվանդ Զորյանի, Արմեն Խերլոփյանի, ինչպես նաև «Թումո»-ի հիմնադիր և տնօրեն Մարի Լու Փափազյանի, ՀԲ Հայաստանի գրասենյակի տնօրեն Կարոլին Գեգինատի, Նոյմեդ ընկերության գլխավոր գիտաշխատող Անի Մարկոսյանի։ Այս մասին հայտնում է ՀՀ էկոնոմիկայի նախարար Վահան Քերոբյանը։
Նրա խոսքով՝ նպատակը փոխգործակցության զարգացումը և գիտության առևտրայնացման հնարավորությունների բացահայտումն է։
«Վստահ եմ, որ նման անձանց հետ շփումները լուրջ խթան կհանդիսանան գործարարների, գիտնականների և երիտասարդ մասնագետների համար՝ ինչպես գործնական նոր գիտելիքների ձեռքբերման, այնպես էլ հետագա հնարավոր շարունակական համագործակցության համար։
Շնորհակալ եմ պարոն Փաթափությանին հրավերս ընդունելու համար։ Շնորհակալություն նաև բոլոր հյուրերին և բանախոսներին իրենց ժամանակը սիրով մեզ նվիրելու համար։ Այնպես որ, գալիք շաբաթ գիտության եզակի, հրաշալի օրեր են սպասում մեզ, բաց չթողնեք»,- գրել է նախարարը։
