Իսրայելի կառավարությունը կասեցրել է 1915 թվականի հայկական իրադարձությունները որպես «ցեղասպանություն» ճանաչելու նախաձեռնության առաջխաղացման գործընթացը, հայտնել է հունական ProtoThema հրատարակությունը։
Իսրայելի կառավարությունը հունիսի 28-ին միաձայն հավանություն էր տվել Արտաքին գործերի նախարար Գիդեոն Սաարի ներկայացրած բանաձևի նախագծին՝ Հայոց ցեղասպանության պաշտոնական ճանաչման վերաբերյալ։ Այժմ փաստաթուղթը պետք է դրվի Քնեսեթի քվեարկությանը։
Ըստ կայքի՝ այս որոշման հիմնական պատճառն Իսրայելի ռազմավարական գործընկեր Ադրբեջանի հետ հարաբերությունների վատթարացման ռիսկն է։
Հոդվածում նշվում է, որ հունիսի վերջին Իսրայելի արտաքին գործերի նախարարությունն առաջ էր քաշել Առաջին համաշխարհային պատերազմի ժամանակ Օսմանյան կայսրությունում տեղի ունեցած իրադարձությունները որպես Հայոց ցեղասպանություն ճանաչելու նախաձեռնություն, և կառավարությունն աջակցել էր դրան, սակայն փաստաթուղթը նաև պետք է հաստատվեր Քնեսեթի կողմից, որպեսզի այն ուժի մեջ մտներ։
Կայքը հիշեցրել է, որ Ադրբեջանը կտրականապես դեմ էր արտահայտվել այս նախաձեռնությանը։ Պաշտոնական Բաքուն հայտարարել էր, որ նման քայլերը չեն ծառայում հաշտեցմանը, այլ ավելի շուտ խորացնում են տարաձայնությունները տարածաշրջանում և խոչընդոտում են երկարատև խաղաղությանը։ Ադրբեջանը կոչ էր արել Իսրայելի կառավարությանը վերանայել որոշումը։
Հոդվածում նշվում է, որ Ադրբեջանի հրեական համայնքի ներկայացուցիչները, ինչպես նաև մի շարք իսրայելցի քաղաքական գործիչներ և փորձագետներ նույնպես դեմ էին արտահայտվել նախաձեռնությանը։ Նրանք նշել էին, որ դա կվնասի ադրբեջանա-իսրայելական ռազմավարական գործընկերությանը։
Իսրայելի ռազմավարության և անվտանգության ինստիտուտի ղեկավար Էֆրայիմ Ինբարը նախաձեռնությունն անվանել էր «աննշան ու մանկական սխալ» և ընդգծել, որ Թուրքիային ուղերձ հղելու փորձը չպետք է վտանգի Բաքվի հետ հարաբերությունները։
Հոդվածում նաև նշվում է, որ Հայաստանի ղեկավարությունը վերջերս հայտարարել էր, որ չի աջակցում 1915 թվականի իրադարձություններն այլ պետությունների կողմից քաղաքական գործիքի վերածելուն։ ՀՀ վարչապետ Նիկոլ Փաշինյանի խոսքով՝ հարցի քաղաքականացումը չի համապատասխանում Հայաստանի շահերին։
ProtoThema-ն գրում է, որ իսրայելական լրատվամիջոցներում տարածված տեղեկատվության համաձայն՝ Բաքուն այս նախաձեռնությունը գնահատել էր որպես «կարմիր գծի հատում»։ Արդյունքում՝ Իսրայելը դադարեցրել է նախաձեռնության առաջխաղացումը Քնեսեթում՝ հաշվի առնելով Ադրբեջանի կոշտ դիրքորոշումը և երկկողմ հարաբերությունների վրա հնարավոր ազդեցությունը։
Հոդվածի հեղինակը կարծում է, որ այս իրադարձությունը ցույց է տալիս Ադրբեջանի աճող դերը տարածաշրջանային և միջազգային քաղաքականության մեջ և ընդգծում է, որ Բաքվի դիրքորոշումը պետք է հաշվի առնվի իր ռազմավարական գործընկերների շահերին վերաբերող հարցերում։
Ավելի վաղ Թուրքիայի ԱԳՆ-ն քննադատել էր Իսրայելի կառավարության որոշումը՝ այն անվանելով «չարամիտ նախաձեռնություն»։ Անկարայից հետո քննադատությամբ հանդես էր եկել նաև Ադրբեջանը՝ կոչ անելով Իսրայելին վերանայել որոշումը։
