Խուզարկել են ՀՅԴ Հայաստանի գերագույն մարմնի ներկայացուցիչ, «Հայաստան» դաշինքի պատգամավորի թեկնածու Իշխան Սաղաթելյանի բնակարանը, Armenia Today-ին հայտնել է Սաղաթելյանի փաստաբան Սերգեյ Հարությունյանը։
Քննչական կոմիտեից Armenia Today-ին հայտնել են, որ քրեական վարույթի շրջանակում կատարվում են քննչական և վարութային գործողություններ։ ՔԿ-ից այլ մանրամասներ չեն նշել։
Հարությունյանը տեղեկացրել է, որ խուզարկությունները ՀՀ գլխավոր հարկադիր կատարողի հաղորդման հիման վրա են՝ Հակակռուպցիոն դատարանում քննվող գործի շրջանակում։ Փաստաբանը հավելել է, որ այս պահին գործի բովանդակությունը չի կարող մանրամասնել։
Հարությունյանը, սակայն, խուզարկությունները կապել է Սաղաթելյանի քաղաքական գործունեության հետ։
«Քննչական գործողություններին մասնակցող ոստիկանների քանակը հենց քաղաքական բնույթի մասին էր վկայում։ Ճնշման ու վախ առաջացնելու նույն քաղաքականության համատեքստում է այս ամենը»,- ասել է փաստաբանը։
Փաստաբանը նաև նշել է, որ այս պահին զերծ կմնա պատասխանել հարցին, թե Սաղաթելյանի բնակարանից քննիչներն ինչ-որ բան առգրավե՞լ են, թե՞ ոչ։ Միևնույն ժամանակ՝ շեշտել է, որ Սաղաթելյանի բնակարանում չէին կարող «ապօրինի առարկա կամ գույք հայտնաբերել»։
Սաղաթելյանն ավելի ուշ լրագրողներին հայտնել է, որ իր բնակարանում խուզարկությունից հետո առգրավել են կանխիկ գումար և զարդեր։ Նրա խոսքով՝ քրեական վարույթի շրջանակում մեծ թվով իրավապահներ շրջափակել էին շենքը, իրեն կանչել հարցաքննության, սակայն առայժմ որևէ կարգավիճակ չունի։
Կենտրոնական ընտրական հանձնաժողովի վերջնական արդյունքներով՝ «Հայաստան» կուսակցությունների դաշինքը խորհրդարան անցնող երրորդ ուժն է՝ ստացել է 12 մանդատ, «Քաղաքացիական պայմանագիրն» ստացել է 64 մանդատ, «Ուժեղ Հայաստան» կուսակցությունների դաշինքը՝ 29 մանդատ։ Սաղաթելյանը դաշինքի ցուցակի 2-րդ համարն է։
Թարմացված է՝ 23.05.2026 | 12։42
