ՀՀ հակակոռուպցիոն կոմիտեն մեկնաբանել է Հայկական պետական մանկավարժական համալսարանի (ՀՊՄՀ) պրոռեկտորի և մի շարք այլ աշխատակիցների ձերբակալության լուրը։
Կոմիտեի մամուլի խոսնակ Մարինա Օհանջանյանն Armenia Today-ին հայտնել է, որ նրանք ձերբակալվել են նախաձեռնված քրեական վարույթի շրջանակում՝ ծառայողական լիազորությունները չարաշահելու, խարդախության, դրան օժանդակելու և պաշտոնեական կեղծիք կատարելու մեղադրանքներով։
Թեև իրավապահ մարմինը պաշտոնապես չի հրապարակել ձերբակալվածների անունները, ըստ Armlur.am-ի տեղեկությունների՝ խոսքը պրոռեկտոր Մարիամ Իսպիրյանի և նրա որդու մասին է։
Միաժամանակ, լրատվամիջոցները հայտնել են, որ նույն գործի շրջանակում ձերբակալվել է նաև Հայաստանի շախմատի ֆեդերացիայի նախագահի առաջին տեղակալ, Շախմատի ակադեմիայի հիմնադիր-տնօրեն Սմբատ Լպուտյանը։
Ըստ շրջանառվող տեղեկությունների՝ գրոսմայստերի ձերբակալությունը ևս կապված է Մանկավարժական համալսարանի շուրջ հարուցված քրեական վարույթների հետ։
Հակակոռուպցիոն կոմիտեն այլ մանրամասներ առայժմ չի հաղորդել՝ ելնելով նախաքննության շահերից։
