Իրանի Իսլամական Հանրապետության դեսպան Խալիլ Շիրղոլամին մարտի 2-ին հրավիրված մամուլի ասուլիսում անդրադարձել է ԱՄՆ-Իսրայել ավիահարվածների հետևանքով Իրանում ստեղծված իրավիճակին, հայ-իրանական սահմանին տիրող իրադրությանը և տարածաշրջանային անվտանգությանը։ Մամուլի ասուլիսը հեռարձակվել է Armenia Today-ի յութուբյան ալիքով։
Դեսպանը հանդիպումն սկսել է մեկ րոպե լռությամբ՝ հարգելով ռազմական գործողությունների հետևանքով զոհվածների հիշատակը, այդ թվում՝ հոգևոր առաջնորդ այաթոլլա Ալի Խամենեիի և ավիահարվածներից զոհված 153 երեխայի։
Ներքաղաքական իրավիճակը կայուն է
Դեսպանը վստահեցրել է, որ Իրանում իշխանության վակուում չի առաջացել: Նրա խոսքով՝ Իսլամական առաջնորդների խորհուրդը շարունակում է կառավարել երկիրն այս անցումային շրջանում:
«Մոտ ապագայում ականատես կլինենք նոր հոգևոր առաջնորդի նշանակմանը»,- նշել է դեսպանը:
ՀՀ-ում Իրանի դեսպանի խոսքով՝ հակառակորդների ցանկությունն էր, որպեսզի Իրանում ներքաղաքական տարաձայնություններ առաջանան հոգևոր առաջնորդի մահից հետո, սակայն դա տեղի չունեցավ։
Ի՞նչ է Իրանն այս օրերին ակնկալում Հայաստանից
Իրանն իր ընկերներից ու բարեկամներից դժվարին օրերին ակնկալում է զորակցություն և համագործակցություն, իսկ Հայաստանն Իրանի բարեկամն է, ասել է Շիրղոլամին։
«Ի վերջո, բոլոր դժվար օրերն էլ անցնում են, բայց մենք իրար կողքի ենք ու մշտապես աջակցում ենք միմյանց։ Ես իմ գնահատանքն ու շնորհակալությունն եմ հայտնում մինչ այժմ հնչած ցավակցական և զորակցական բոլոր խոսքերի համար»,- նշել է դեսպանը։
Եթե ագրեսիվ գործողությունները շարունակվեն, ապա տարածաշրջանում գտնվող բոլոր երկրների համար կստեղծվեն ոչ բարենպաստ պայմաններ, ասել է դեսպանը։ Նրա խոսքով՝ Իրանի բարեկամ և հարևան ՀՀ-ի անվտանգությունը «չափազանց կարևոր է», իսկ տարածքային ամբողջականությունը՝ «կարմիր գիծ»։
«Մեր ցանկությունն է, որպեսզի Հայաստանը միջազգային օրենքները խախտողների գործողությունների հետևանքով երբեք որևէ վնաս չկրի»,- շեշտել է նա։
«Զանգեզուրի միջանցքն» արհեստական տերմին է
Մեր տեսակետը ՀՀ-ի տեսակետի հետ մեկն է TRIPP-ի մասին, ասել է դեսպանը՝ նշելով, որ միջանցքի գաղափարը ենթադրում է ինքնիշխանության հարցում որոշակի զիջումներ, ինչը Հայաստանի համար ընդունելի չէ, հետևաբար՝ ընդունելի չէ Իրանի համար։
«Մի արհեստական անուն էլ դրա համար ներկայացվել էր՝ «Զանգեզուրի միջանցք», որի վերաբերյալ Իրանը վճռականորեն հայտարարել է, որ ոչ մի գեոպոլիտիկ փոփոխություն, ինչպես նաև ինքնիշխանության հարցում որևէ փոփոխություն Իրանը չի հանդուրժի»,- ընդգծել է նա։
Դեսպանը հիշեցրել է, որ Իրանի Իսլամական Հանրապետության գերագույն հոգևոր առաջնորդը բազմաթիվ հայտնի խոսքեր ունի, որոնք քննադատում էին հենց այդ արհեստածին գաղափարը։
Իրանն ուզում էին Սիրիայի վերածել, ինչը չհաջողվեց
Տնտեսական որոշ հարցերով պայմանավորված՝ Իրանում տեղի են ունեցել հատկապես շուկաների ներկայացուցիչների բողոքների ակցիաներ։ Իրանի սահմանադրությամբ և օրենքներով նախատեսված է, որ ժողովուրդն ունի խաղաղ ցույցերի իրավունք, և այս դեպքերի ժամանակ էլ Իրանը պաշտոնապես ճանաչել է խաղաղ ցույցերի իրավունքը, պարզաբանել է դեսպանը՝ Armenia Today-ի հարցին ի պատասխան։
«Հենց նույն այն ուժերը, որոնք ձեռնարկեցին այս ագրեսիան և այս պատերազմն Իրանի դեմ, հատկապես հունվարի 8-ին և 9-ին զինված և կազմակերպված հատուկ խմբեր ներդրեցին, ուղարկեցին Իրան՝ ցույց իրականացնող մարդկանց շրջան, ինչի արդյունքում ծանր կորուստներ ունեցանք։ Նրանք թիրախավորում էին թե՛ անվտանգության ուժերը, թե՛ քաղաքացիական բնակչությանը։ Նրանք ավերում և վնասներ էին հասցնում հանրային վայրերին և մարդկանց ունեցվածքին։ Իրանն ուզում էին Սիրիայի վերածել, ինչը չհաջողվեց։ Բնական է և ակնհայտ, որ կա հստակ տարբերություն խաղաղ ցույցերի և բռնի ուժով ուղեկցվող գործողությունների, հանցագործությունների միջև»,- մանրամասնել է նա։
Դեսպանի խոսքով՝ ոչ մի երկիր չի հանդուրժի նման կերպով բռնությամբ ուղեկցվող գործողություններ, և որևէ մեկն իրեն չի կարող ցույց տալ երկիր, որ նման պայմաններում կհանդուրժի այն անձանց և այն ուժերին, ովքեր կրակում են անվտանգության ներկայացուցիչների ուղղությամբ։
«Ցավոք, այս կազմակերպված հանցավոր խմբերի գործողությունների, ինչպես նաև այդ հանցավոր խմբերի դեմ իրականացված անվտանգային ուժերի համապատասխան գործողությունների ընթացքում առաջացած խառնաշփոթի հետևանքով, մեր համերկրացիներից շատերը զոհվեցին և վիրավորվեցին»,- հավելել է դեսպանը։
Նա հիշեցրել է, որ ԱՄՆ նախագահ Դոնալդ Թրամփը հայտարարում էր, թե օգնություն կուղարկի, սակայն նշել է՝ պատերազմն էր նրա բերած օգնությունը։
«Այդ օգնությունը ես հիմա ձեզ ցույց կտամ։ Սա է պարոն Թրամփի օգնությունը, որը նա ուղարկել է։ Սա դպրոցում զոհված աղջիկ աշակերտներից մեկի նկարն է։ Իրանը ցանկանում էր անկախ լինել, իսկ այդ երկրները ցանկանում են, որ Իրանը լինի նրանց ստրուկը»,- ասել է դեսպանը՝ պարզելով աղջկա լուսանկարը։
