ԱՄՆ-ն պետք է ավելի վճռականորեն միջամտի՝ հյուսիս-արևելքում քրդերի դեմ Սիրիայի կառավարության հարձակումը դադարեցնելու համար, Reuters-ին ասել է Քրդական ժողովրդական պաշտպանության ջոկատների (YPG) հրամանատար Սիփան Համոն:
«Մենք շոշափելի արդյունքի մեծ հույս ունենք, հատկապես կոալիցիայի և Միացյալ Նահանգների կողմից, որպեսզի առկա խնդիրներին նրանց միջամտությունն ավելի վճռական լինի, քան հիմա է»,- ասել է Համոն:
Նա հայտնել է, որ ԱՄՆ դեսպան Թոմ Բարաքի և քուրդ պաշտոնյաների միջև հունվարի 17-ին կայացած հանդիպման ժամանակ հրադադարի համաձայնագիր չի կնքվել: Նա հերքել է այն պնդումը, որ Սիրիայի քրդերը ցանկանում են անջատվել կամ անկախ պետություն ստեղծել՝ նշելով, որ իրենց ապագան կապված է Սիրիայի հետ:
Գործակալությունը նշում է, որ սիրիական ուժերը շարունակում են հարձակումը՝ չնայած ԱՄՆ կենտրոնական հրամանատարության կողմից դադարեցման մասին ավելի վաղ արված կոչին: Reuters-ի աղբյուրների համաձայն՝ հունվարի 18-ին Սիրիայի կառավարական ուժերը մտել են Ռաքքայի ծայրամաս, որը 2017 թվականից ի վեր վերահսկվում էր քրդական «Սիրիայի դեմոկրատական ուժեր» դաշինքի (SDF) կողմից, որի մեջ են մտնում նաև քրդական ուժերը:
Կառավարական բանակը և նրան աջակցող տեղաբնակ արաբական ուժերն ավելի վաղ վերահսկողության տակ էին վերցրել Դեյր էզ-Զորի մոտ Եփրատից արևելք գտնվող հիմնական նավթագազային հանքավայրերը: Գործակալությունն այս հանքավայրերն անվանում է «քրդական ուժերի եկամտի հիմնական աղբյուր» և նշում, որ Դամասկոսի վերահսկողության տակ դրանց անցումը «լուրջ հարված» է հասցրել քրդերին:
Սիրիայի կառավարությունում, գործակալության աղբյուրի խոսքով, քրդական ուժերը ջախջախվել են արաբ ցեղային մարտիկների հարձակումից հետո, ինչը թույլ է տվել կառավարությանն առաջանալ Եփրատի արևելյան ափի երկայնքով գտնվող տարածքներում: Հարձակման արդյունքում Դեյր էզ-Զոր նահանգի մեծ մասը, ենթադրաբար, կառավարության վերահսկողության տակ է անցել: Հունվարի 17-ի ուշ երեկոյան բանակը նաև վերահսկողության տակ է վերցրել Ռաքքայից արևմուտք գտնվող Տաբկա քաղաքը և մոտակա ամբարտակը:
ՏԱՍՍ-ի փոխանցմամբ՝ Սիրիայի անցումային կառավարության զինված ուժերի հունվարի 17-ին սկսած արագ հարձակումն աջակցություն է ստացել տեղի արաբական ցեղերի կողմից, որոնք որոշ շրջաններում գրավել են քրդական ՍԴՈւ ուժերի շտաբերն ու զորանոցները: Գործակալությունը նշել է, որ Ալ-Ջազիրա շրջանի ցեղային շեյխերը հայտարարել են Սիրիայի կառավարության կողմն անցնելու մասին:
