Շուշիի նախկին փոխքաղաքապետ, Արցախի ռազմահայրենասիրության նախարարության աշխատակազմի ղեկավար, նախագահի աշխատակազմի ղեկավարի տեղակալ, ԱԱԾ հետախուզության սպա Սարգիս Գալստյանն Ադրբեջանի օգտին լրտեսություն իրականացնելու մեղադրանքով պատիժը կրում է Արթիկի բանտում, հայտնում է «Ազատությունը»։
Նշվում է, որ Գալստյանի գործով դատական որոշումն ուժի մեջ է մտել նախորդ ամիս և նա տեղափոխվել է պատժի կրման վայր:
2024 թվականի նոյեմբերին Գալստյանը մեղավոր էր ճանաչվել լրտեսության համար և դատապարտվել 18 տարվա ազատազրկման։ Քննչական կոմիտեն հայտնել էր, որ Գալստյանը 2018-2023թթ. Արցախում զբաղեցնելով տարբեր պետական պաշտոններ՝ 2020 թվականի նոյեմբերին կապ էր հաստատել օտարերկրյա պետության հատուկ ծառայությունների աշխատակցի հետ (Ադրբեջան-խմբ․), ստացել էր «Սարխան» ծածկանունը։
Գալստյանը նախաքննության ընթացքում խոստովանել էր, որ կապ է հաստատել Ադրբեջանի Միլի Մեջլիսի պատգամավոր Թուրալ Գյանջալիևի հետ՝ SMS գրելով նրա հեռախոսահամարին: Այդ հաղորդագրությունից էր սկսվել, ըստ նյութերի, Գալստյանի կապն Ադրբեջանի հատուկ նշանակության ծառայություն հետ։
Դատական գործի նյութերի համաձայն Գալստյանը 2020 թվականի նոյեմբերին կապ էր հաստատել օտարերկրյա պետության հատուկ հետախուզության ծառայության աշխատակցի հետ, ումից էլ ստացել էր լրտեսություն կատարելու հանձնարարություն:
Ավելի քան մեկ տարի տևած դատավարության նյութերում նշվում է, որ Գալստյանը 2020-2023 թվականների ընթացքում հավաքել և WhatsApp-ի ու բջջային այլ հավելվածների օգնությամբ՝ նամակագրության, զանգերի միջոցով՝ հատուկ ծառայության աշխատակցին էր հանձնել «Արցախում գտնվող բնակչության կարիքների, անգամ սննդի առկայության մասին տեղեկություններ, նաև թե ինչ տրամադրություններ կան արցախահայերի շրջանում»:
Գալստյանը, ըստ գործի նյութերի, նաև մանրամասներ էր փոխանցել Արցախյան հարցի կապակցությամբ Հայաստանի և Արցախի իշխանության ներկայացուցիչների դիրքորոշումների, նրանց միջև հակասությունների, բնակչության զինվածության, հնարավոր դիմադրության մասին:
«Ազատությունը» հայտնում է, որ Արցախի հայաթափումից հետո, շուրջ կես տարի, մինչև Հայաստան արտաքսվելը Գալստյանը կնոջ հետ բնակվել է գերեվարված և այժմ Բաքվի բանտում գտնվող Արցախի նախկին նախագահ Բակո Սահակյանի տանը:
Գալստյանը կնոջ հետ Հայաստան էր արտաքսվել 2024-ի մարտի 29-ին: Ինչպես նա է պնդել, մարտի 4-ին Ստեփանակերտում տնային կալանքի տակ էին և սպասել են Ադրբեջանի իշխանությունների որոշմանը՝ կա՛մ պետք է Երևան գային, կա՛մ՝ Բաքու: Ի վերջո՝ նրանց Հայաստան են արտաքսել: Պատճառներն, ըստ Գալստյանի, իրեն հասկանալի չեն:
Գալստյանի պաշտպան Ալեքսանդր Կոչուբաևն «Ազատությանը» փոխանցել է, որ գործում ընդհանրապես լրտեսության փաստը հիմնավորող ապացույցներ չկան, ադրբեջանցի պատգամավորի հետ Գալստյանը կապվել է միմիայն Շուշիից գորգեր վերադարձնելու նպատակով:
Փաստաբանն արդեն բողոք է ուղարկել Մարդու իրավունքների եվրոպական դատարան (ՄԻԵԴ) ոչ միայն արդար դատաքննության իրավունքի խախտման, այլև այն հիմքով, որ Հայաստանի դատարանը չէր կարող քննել Գալստյանի գործը, քանի որ Հայաստանի իշխանության հայտարարության համաձայն՝ Ղարաբաղն Ադրբեջանի տարածք է:
