Ռուսական բիզնեսն սկսել է զգուշորեն մոտենալ Հայաստանի հետ աշխատանքին, հայտարարել է ՌԴ փոխվարչապետ Ալեքսեյ Օվերչուկը, փոխանցում է «Ինտերֆաքսը»։
Նրա գնահատմամբ՝ Հայաստանն ու Ռուսաստանն, ընդհանուր առմամբ, լավ կապեր են պահպանում, սակայն երկրների միջև առևտուրն զգալիորեն նվազել է 2025 թվականին։
«Այս տարի նկատել ենք Հայաստանի հետ տնտեսական առևտրի անկում, եթե խոսքը Ռուսաստանի և Հայաստանի միջև փոխադարձ առևտրի մասին է։ Անցած տարի, ինչպես հիշում եք, մեր երկրների միջև առևտուրը կազմել է 12,4 մլրդ դոլար։ Այս տարի այն, հավանաբար, կկազմի շուրջ 6 մլրդ դոլար։ Սա զգալի անկում է»,- ընդգծել է փոխվարչապետը։
Նրա խոսքով՝ ինչ-որ պահի Հայաստանն ստիպված կլինի ընտրություն կատարել Եվրոպական Միության և Եվրասիական տնտեսական միության (ԵԱՏՄ) միջև։
«Եվրամիության հետ Հայաստանի մերձեցման վերաբերյալ բազմիցս խոսել ենք։ Կարծում ենք, որ երկու ինտեգրացիոն միավորումներին անդամակցությունն անհամատեղելի է։ Ինչ-որ պահի Հայաստանի ժողովուրդն ստիպված կլինի ընտրություն կատարել»,- ասել է նա։
Ավելի վաղ ՀՀ վարչապետ Նիկոլ Փաշինյանը հայտարարել էր, որ ԵԱՏՄ-ից դուրս գալը ՀՀ-ի համար նպատակ չէ, իսկ ԵՄ անդամ դառնալը նպատակ է։
Կառավարությունը հունվարի 9-ի նիստում հավանություն էր տվել ՀՀ-ի՝ ԵՄ-ին անդամակցելու գործընթացի մեկնարկի վերաբերյալ նախագծին։ Փաշինյանն ընդգծել էր, որ նախագիծը չի նշանակում Հայաստանի անհապաղ անդամակցում ԵՄ-ին, և վերջին խոսքը պետք է հայտնեն քաղաքացիները՝ հանրաքվեի միջոցով։ Նույն օրը Կրեմլից նշել էին, որ Հայաստանը չի կարող միաժամանակ լինել և՛ ԵՄ, և՛ ԵԱՏՄ անդամ։
