ՀՀ արտաքին գործերի նախարարությունը Մերձավոր Արևելքում լարվածության սրման ֆոնին թեժ գծեր է բացել Իրանում և Իսրայելում գտնվող ՀՀ քաղաքացիների համար, հայտնում է գերատեսչությունը։
Նախարությունը վստահեցրել է, որ ուշադիր հետևում է Մերձավոր Արևելքում տիրող իրավիճակին և կոչ է անում քաղաքացիներին պահպանել անվտանգության կանոնները և հետևել պաշտոնական ցուցումներին։
«ՀՀ արտաքին գործերի նախարարությունը շարունակելու է իրավիճակի մշտադիտարկումը և, ըստ անհրաժեշտության, հանդես կգա տեղեկատվության թարմացմամբ»,- ասվում է հաղորդագրությունում։
Թեժ գծեր
Իրանում ՀՀ դեսպանության թեժ գիծ. +98 902 0059927: Վերջինի անհասանելի լինելու դեպքում՝ ԱԳՆ թեժ գիծ. +37455620111 (նաև WhatsApp)։
Իսրայելում ՀՀ դեսպանության թեժ գիծ. +972 58 607-0313 (նաև WhatsApp), +972585811144։
Փետրվարի 28-ի առավոտյան Իսրայելը կանխարգելիչ հարված էր հասցրել Իրանին։ Իսևայելի պաշտպանության նախարար Իսրայել Կացը հաստատել էր հարձակումը։ Associated Press-ի տվյալներով՝ ԱՄՆ-ն մասնակցում է Իրանի դեմ Իսրայելի ռազմական գործողությանը։ Reuters-ը տեղեկացրել է, որ Իրանի գերագույն առաջնորդ Ալի Խամենեին Թեհրանում չէ և տեղափոխվել է անվտանգ վայր։
Ի պատասխան՝ Իրանը տասնյակ հրթիռներ էր արձակել Իսրայելի և Մերձավոր Արևելքում գտնվող ամերիկյան բազաների ուղղությամբ, ԶԼՄ-ները հաղորդել են զոհերի մասին։ Իրանը հաստատել էր, որ հարձակվել է Մերձավոր Արևելքում գտնվող չորս ամերիկյան բազայի վրա՝ Կատարում, Քուվեյթում, ԱՄԷ-ում և Բահրեյնում, հաղորդում է Fars լրատվական գործակալությունը։
