Երևանի Armenia Marriott հյուրանոցում ստուգումներ կանցկացվեն պայմանավորված 10 մարդու՝ սուր աղիքային վարակ ախտորոշմամբ հիվանդանոցներ տեղափոխվելու հետ, հայտնել է Հայաստանի սննդամթերքի անվտանգության տեսչական մարմինը։
Գերատեսչության տվյալներով՝ հուլիսի 17-ի երեկոյան Հիվանդությունների վերահսկման և կանխարգելման ազգային կենտրոնը (ՀՎԿԱԿ) հայտնել է, որ 10 քաղաքացի հոսպիտալացվել է Ինֆեկցիոն հիվանդությունների ազգային կենտրոն և «Միքայելյան» վիրաբուժության ինստիտուտ՝ սուր աղիքային վարակ ախտորոշմամբ։
Համաճարակաբանական հետազոտությունը ցույց է տվել, որ բոլոր հիվանդները հուլիսի 14-ին մասնակցել են Հայաստանում Ֆրանսիայի դեսպանատան կազմակերպած ընդունելությանը՝ նվիրված Ֆրանսիայի Ազգային տոնին՝ Բաստիլի գրավման օրվան, հայտնել է
Միջոցառման ընթացքում նրանք կերել են դեսպանատան բակում կազմակերպված ֆուրշետի ժամանակ մատուցված կերակրատեսակները։
Տեսչական մարմինը ուսումնասիրություններ է սկսել, թե որտեղ է պատրաստվել և ձեռք բերվել ընդունելության ժամանակ մատուցված սնունդը։
Հուլիսի 23-ի երեկոյան Հայաստանում Ֆրանսիայի դեսպանատունը գերատեսչությանը տեղեկացրել է, որ միջոցառման կազմակերպմամբ զբաղվել է երևանյան Armenia Marriott հյուրանոցը։
Տեսչական մարմնից նշել են, որ դեպքի մասին տեղեկությունը ստացվել է միջոցառումից գրեթե 10 օր անց, ուստի սննդամթերքի համապատասխան խմբաքանակն արդեն ամբողջությամբ սպառված է։ Չնայած դրան՝ ապագայում նման դեպքերը կանխելու և հանրային առողջությունը պաշտպանելու նպատակով Armenia Marriott հյուրանոցում կիրականացվի ստուգում։ Դրա արդյունքների մասին գերատեսչությունը խոստացել է լրացուցիչ տեղեկացնել։
Ընդունելության մասնակիցների շրջանում սուր աղիքային վարակի դեպքերի մասին տեղեկատվության հայտնվելուց հետո Հայաստանում Ֆրանսիայի դեսպանատունը հաստատել է, որ հուլիսի 14-ին Ֆրանսիայի Ազգային տոնի առթիվ անցկացված միջոցառման որոշ հյուրերի մոտ նկատվել են սննդային թունավորման նմանվող ախտանշաններ։ Այս կապակցությամբ դիվանագիտական ներկայացուցչությունը դիմել է ՀՀ առողջապահության նախարարություն, ցավակցություն հայտնել տեղի ունեցածի համար և հայտարարել, որ ակնկալում է դեպքի պատճառների բացահայտումը։
Դեսպանատունը նաև կոչ է արել ընդունելության այն մասնակիցներին, որոնց մոտ նմանատիպ ախտանշաններ են ի հայտ եկել, այդ մասին տեղեկացնել էլեկտրոնային փոստով։
