Ամենայն Հայոց կաթողիկոս Գարեգին Բ-ի հրաժարականը պահանջող հոգևորականներից ոմանք հայտնվել են անորոշության մեջ՝ կապված իշխանությունների կողմից եկեղեցու ղեկավարության դեմ արշավի ժամանակավոր «սառեցման» հետ, գրել է «Հրապարակ» օրաթերթը:
Ըստ թերթի աղբյուրների՝ նրանց թվում են Վայոց ձորի Տեր Աբրահամ արքեպիսկոպոս Մկրտչյանը և Արցախի թեմի առաջնորդ Տեր Վրթանես եպիսկոպոս Աբրահամյանը: Նրանք նշել են, որ չեն կարողանում ազատ շփվել մարդկանց հետ և իրականացնել թեմի առաջնորդի իրենց գործառույթները:
Նշվում է, որ բարձրաստիճան հոգևորականները, այնուհանդերձ, ընտրության առաջ են, եթե փորձեն վերադառնալ վեհափառի հովանու ներքո, կարող են հայտնվել «իշխանական գիլյոտինի» տակ։
Մի խումբ բարձրաստիճան հոգևորականներ 2025 թվականի հուլիս-օգոստոս ամիսներին հրապարակային հայտարարություններով հանդես էին եկել Մայր Աթոռի դիրքորոշման դեմ՝ փաստացի սատարելով իշխանությունների քաղաքականությանը եկեղեցու նկատմամբ: «Տիրադավներ» անվանումն ստացած այս խմբի մեջ էին ընդգրկված, ի թիվս այլոց, Արցախի թեմի առաջնորդ, Գուգարաց թեմի առաջնորդ Հովնան եպիսկոպոս Հակոբյանը և ուրիշներ: Նրանք հայտարարել էին, որ Ամենայն Հայոց կաթողիկոսը պետք է «հանգստի կոչվի»: Մայր Աթոռը նրանց գործողությունները որակել էր որպես «եկեղեցական կարգապահության կոպիտ խախտում» և հորդորել «վերադառնալ կանոնական դաշտ»:
