Իշխանությունները փորձում են մեղմել խոշոր պարգևավճարների թեման՝ ցույց տալով, որ միայն իրենք չեն օգտվում բյուջեից, այլև թոշակառուները, խոցելի խմբերը, գրել է «Հրապարակ» օրաթերթը՝ հղում անելով իր աղբյուրներին։
Ըստ թերթի՝ ԱԺ-ում «Քաղաքացիական պայմանագիր» խմբակցության նախաձեռնությամբ տեղի ունեցած Առողջապահության համապարփակ ապահովագրության գործարկման ընթացքի վերաբերյալ աշխատանքային քննարկումն այդ նպատակով էր։
Առողջապահության նախարար Անահիտ Ավանեսյանն ավելի քան երկու ժամ ներկայացնում էր, թե ինչ լավ բան են անում քաղաքացիների համար, որքան մարդ է համակարգի ներդրման պահից անվճար բուժօգնություն ստացել ապահովագրության ներդրման շրջանակներում։
Ազգային ժողովի յուրաքանչյուր պատգամավորի տարեվերջին փոխանցվել էր 3 մլն դրամ։ ԶԼՄ-ների տվյալներով՝ 2025 թվականի դեկտեմբերին նախարարներն ու նրանց տեղակալները ևս ստացել էին միլիոնավոր դրամների պարգևավճարներ։ Հունվարին Արդարադատության նախարար Սրբուհի Գալյանը հաստատել էր, որ ստացել է 6-7 մլն դրամ պարգևավճար։ Վարչապետ Նիկոլ Փաշինյանը հունվարի 15-ին հայտարարել էր, որ իր ամսական վարձատրության ավելացումը կազմել է մոտ 1,5 մլն դրամ։
Հունվարի 23-ին հայտնել էինք, որ իշխանությունները ծրագրում են 2025-ի երկրորդ կիսամյակի համար ևս պարգևատրումներ բաշխել պաշտոնյաներին՝ չնայած առաջին կիսամյակում տրված միլիոնավոր դրամների շուրջ առկա հանրային դժգոհությանը։
