Միջազգային քրեական դատարանի նախկին դատախազ Լուիս Մորենո Օկամպոն պահանջում է, որ ՄԱԿ-ի կամայական ձերբակալությունների աշխատանքային խումբն (WGAD) անվավեր ճանաչի Արցախի նախկին պետնախարար Ռուբեն Վարդանյանի վերաբերյալ իր կարծիքը՝ մատնանշելով խմբի ղեկավար Գաննա Յուդկիվսկայի շահերի բախումն Ադրբեջանի հետ։
Օկամպոյի հրապարակած զեկույցի համաձայն՝ Յուդկիվսկան Ուկրաինայից է և հանդիսանում է Equity Law Firm իրավաբանական ընկերության գործընկեր, որն իրավական ծառայություններ է մատուցում Ադրբեջանի պետական նավթային ընկերությանը՝ SOCAR-ին։ Օկամպոն շեշտել է, որ, այդուհանդերձ, նա մասնակցել է Վարդանյանի գործով ՄԱԿ-ի քննարկմանը, որից հետո էլ խումբն իր կարծիքում «կամայական չէր համարել» ապօրինի կալանքը։
Յուդկիվսկայի մասնակցությունը Վարդանյանի գործի քննարկմանը, ըստ Օկամպոյի, խախտել է ՄԱԿ-ի էթիկայի կանոնները և անկողմնակալության պահանջը, որի հիմքով էլ խումբը պետք է անվավեր ճանաչի Վարդանյանի վերաբերյալ իր կարծիքը։ Օկամպոյի պնդմամբ՝ Յուդկիվսկան պետք է ինքնաբացարկ հայտներ ու չմասնակցեր քննարկմանը։
Ըստ Օկամպոյի՝ Յուդկիվսկան նախկինում հրաժարվել է մասնակցել Ռուսաստանի հետ կապված գործերին, սակայն չի կիրառել նույն մոտեցումը Վարդանյանի գործի դեպքում, որին Ուկրաինան պատժամիջոցների ցուցակում էր ներառել՝ Ռուսաստանի հետ կապերի համար։
ՄԱԿ-ի կամայական ձերբակալությունների աշխատանքային խումբը փետրվարին եզրակացրել էր, որ Վարդանյանի՝ Ադրբեջանի կողմից կալանավորումը «կամայական չի համարվում»։ Խումբը նշել էր, որ Վարդանյանը ձերբակալվել է օրինական հիմքով, չկան կալանքի քաղաքական դրդապատճառներ, և միջազգային իրավունքի հիման վրա նրա ազատության իրավունքները չեն խախտվել։
Ադրբեջանում, պաշտոնական տվյալներով, 23 հայ գերի կա։ Հունվարի 17-ին սկսվել էին Արցախի ռազմաքաղաքական առաջնորդների դատավարությունները: Նրանք մեղադրվում են 2548 դրվագով։
Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, Վարդանյանը, ԱԺ նախկին նախագահ Դավիթ Իշխանյանը, նախկին արտգործնախարար Դավիթ Բաբայանը, Պաշտպանության նախկին նախարար Լևոն Մնացականյանը, Պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։
