Դատավոր Արմինե Մելիքսեթյանը սեպտեմբերի 24-ի դատական նիստում մեղավոր ճանաչեց Շիրակի թեմի առաջնորդ Միքայել արքեպիսկոպոս Աջապահյանին։ Միևնույն ժամանակ՝ նա անփոփոխ թողեց սրբազանի գործող խափանման միջոցն ու սահմանափակումները։
Նա Աջապահյանի գործով լրացուցիչ դատալսումներ նշանակեց սեպտեմբերի 29-ին՝ ժամը՝ 15։30-ին։ Աջապահյանի փաստաբանները հայտարարեցին, որ այդ օրը դատավորը կորոշի, թե ինչ պատիժ է սահմանվելու։
Աջապահյանի փաստաբան Արա Զոհրաբյանը լրագրողներին հայտնեց, որ ամենայն հավանականությամբ՝ դատարանն այնպիսի պատիժ կսահմանի, որ Միքայել սրբազանին մինչև ընտրություններ փակի տակ պահի։
«Մենք բոլորս այստեղ տեսանք, թե դատավորն ինչ կոպիտ խախտումներ է թույլ տալիս, ջանքեր գործադրում՝ հասցնելու այդ տրամաբանական կետին: Մենք կանխատեսում ենք, որ ազատազրկման հետ կապված պատիժ են միջնորդելու»,- նշեց Զոհրաբյանը:
Նրա խոսքով՝ սրբազանը քրեորեն պատժելի կոչ չի արել, քանի որ կոչն անում են կա՛մ ներկայով, կա՛մ ապագայով, իսկ սրբազանը խոսել է անցյալի մասին։ Նա շեշտեց, որ այն պարագայում, երբ «ակնհայտ անմեղ մարդուն մեղավոր են ճանաչում», չի կարելի արդարադատություն սպասել դատավորից: Բացի այդ, Զոհրաբյանը հավելեց, որ արքեպիսկոպոսին սահմանափակումների են ենթարկել ընդամենը բանավոր խոսքի համար, ինչը, Զոհրաբյանի գնահատմամբ, աննախադեպ դաժան քայլ է և «անմարդկային վերաբերմունք» սրբազանի նկատմամբ:
Փաստաբանը հայտնեց, որ դատավճիռը բողոքարկելու են:
Միքայել սրբազանի մյուս փաստաբան Երեմ Սարգսյանն էլ ավելացրեց, որ ապօրինությունների ու խախտումների աննախադեպ ծավալ է կիրառվել: Նա ևս մեկ անգամ բարձրաձայնեց դատավորի «կաշկանդված լինելը»: Սարգսյանն այս դատավարությունը համեմատեց Բաքվի դատում հայ գերիների նկատմամբ տարվող գործընթացի հետ՝ այն «արդարադատության ձևականացում» որակելով:
«Ցավոք, ՀՀ-ում հենց հիմա տեղի ունեցավ այն նույն գործընթացը, որն իբր թե ժողովրդավար և իրավական պետությունում է արվում»,- ընդգծեց փաստաբանը:
Աջապահյանի նկատմամբ հունիսի 26-ին քրեական հետապնդում էր հարուցվել։ Հունիսի 27-ին ԱԱԾ աշխատակիցները քննչական գործողություններ էին իրականացրել Շիրակի թեմի առաջնորդարանում և Ամենայն Հայոց կաթողիկոս Գարեգին Բ-ի նստավայրում։ Նա մեղադրվում է իշխանությունը զավթելու կոչի համար:
