Երևանի քաղաքապետ Տիգրան Ավինյանը 1,5 տարի առաջ հարցաքննվել է Հայաստանի պետական շահերի հիմնադրամի (ԱՆԻՖ) հետ կապված քրեական գործով՝ որպես վկա։ Նա այս մասին հայտարարել է սեպտեմբերի 15-ին տեղի ունեցած մամուլի ասուլիսի ժամանակ։
Նա այդ ժամանակ հիմնադրամի խորհրդի նախագահն էր։ Ավինյանը նշել է, որ իր ունեցած ամբողջ տեղեկությունը հայտնել է իրավապահներին։
«Որ անընդհատ ԱՆԻՖ-ի գործունեությունը ներկայացվում է որպես վա՜տ, վատ, դա այնքան էլ այդպես չէ։ ԱՆԻՖ-ն ուներ օտարերկրյա ներդրումների հետ կապված խնդիր՝ 210 միլիոն դոլար ներգրավելու։ ԱՆԻՖ-ի գործունեության արդյունքում ստեղծվել է 800 նոր աշխատատեղ։ Երբ ասվում է ԱՆԻՖ-ն անարդյունավետ էր, ապա նրա վրա պետությունը ծախսել էր 4,19 միլիարդ դրամ, ԱՆԻՖ-ի ստեղծած դուստր ընկերությունները 5,5 միլիարդ դրամ հարկերի տեսքով վերադարձրել են ՀՀ»,- շեշտել է Ավինյանը։
Քաղաքապետի խոսքով՝ այս ամենի հետ մեկտեղ հիմնադրամի գործունեությունը պարունակում էր բիզնես ռիսկեր, քանի որ մի ծրագիրը կարող էր ստացվել, մյուսը՝ ոչ։
Ավինյանը մանրամասնել է, թե ինչ է տեղի ունեցել հիմնադրամի շուրջ։ Նա պարզաբանել է, որ այն ժամանակվա Էկոնոմիկայի նախարար Վահան Քերոբյանը նախաձեռնել է հիմնադրամի ամբողջ փաթեթը փոխանցումն Էկոնոմիկայի նախարարությանը, որից հետո իրականացրել է կադրային կտրուկ փոփոխություններ, ինչը հանգեցրել է նրան, որ թիմը հրաժարվել է շարունակել աշխատանքը։
Ավինյանը ՔԿ-ին առաջարկել է հարցում ուղարկել Միացյալ Նահանգներ՝ CFW (Cyber Future Works) և Orbis-ի միջև կապը պարզելու համար։ Ըստ նրա՝ CFW-ն հիմնադրվել է ԱՆԻՖ-ի և երկու ընկերության՝ «Հայք»-ի և «Արարատ»-ի կողմից։ Երկուսն էլ գրանցված են ԱՄՆ-ում Orbis-ի կողմից։
Լրագրողի հարցին, թե հարցաքննվե՞լ է արդյոք Ավինյանի կինն ԱՆԻՖ-ի հարցով, Ավինյանը թողել է անպատասխան։ Նշենք, որ CFW ՓԲԸ-ի տնօրեն Կարինե Անդրեասյանը Ավինյանի կնոջ ընկերուհին է և, ըստ մամուլի, հիմնադրվելուց 8 օր անց ստացել է ներդրում։
2024-ի օգոստոսի 1-ին վարչապետ Նիկոլ Փաշինյանը հայտարարել էր, որ իր հանձնարարությամբ ԱՆԻՖ-ում տեղի ունեցած ձախողումների հարցով ուսումնասիրություն է սկսվել, և այդ փաստի առթիվ հարուցված քրեական գործ կա։ Նշենք, որ Fly Arna ավիաընկերությունը, որն այլևս չի գործում, Air Arabia ավիաընկերության և ԱՆԻՖ-ի կողմից էր հիմնադրվել։
ԶԼՄ-ներն «ընկերության ձախողումը կապել էին Ավինյանի հետ, քանի որ նա միջնորդ էր հանդիսացել, որպեսզի ընկերությունը թռիչքներ իրականացնի Հայաստանում»:
Ավինյանը 2019-2023 թվականներին ԱՆԻՖ-ի տնօրենների խորհրդի նախագահն էր։ ԱՆԻՖ-ում չարաշահումների, իր կողմից պարտականությունները չկատարելու մեղադրանքներին անդրադառնալով՝ նա հերքել էր դրանք՝ նշելով, որ ԱՆԻՖ-ը ճիշտ է կատարել առաջադրված խնդիրները։
Ապրիլին Ավինյանը հայտարարել էր, որ իր հետ կապված իրավական գործընթաց չկա և չի կարող լինել՝ հերքելով տեղեկությունը, ըստ որի՝ ՀՀ գլխավոր դատախազ Աննա Վարդապետյանն ԱՆԻՖ-ի չարաշահումների գործով պատրաստվում է մեղադրանք առաջադրել իրեն։
