Հայաստանի և Ադրբեջանի միջև նախաստորագրված խաղաղության համաձայնագիրն ու ԱՄՆ-ում ստորագրված հռչակագիրը շոշափելի օգուտներ են պարունակում Իրանի և Ռուսաստանի համար, Fox New-ին տված հարցազրույցում հայտարարել է ՀՀ վարչապետ Նիկոլ Փաշինյանը։
Փաշինյանը նշել է, որ երբ համաձայնագիրը կյանքի կոչվի, Իրանը երկաթուղային հասանելիություն կստանա Պարսից ծոցից մինչև Սև ծով։ Նրա խոսքով՝ դա թույլ կտա ուղիղ երկաթուղային հաղորդակցություն հաստատել Ռուսաստանի և Իրանի միջև։
Վարչապետն ընդգծել է, որ համաձայնագրի տնտեսական կողմը հաշվի առնելով՝ Ռուսաստանն ու Իրանը, ի թիվս այլ երկրների, կստանան կարևոր և աննախադեպ առավելություններ, քանի որ ներկայումս Հարավային Կովկասից չկա երկաթուղային կապ, որն ուղղակիորեն կապում է այդ պետություններին:
Օգոստոսի 8-ին Վաշինգտոնում Հայաստանի և Ադրբեջանի ղեկավարները ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP (Trump Route for International Peace and Prosperity) տրանսպորտային երթուղի: Երթուղին պետք է Ադրբեջանը միացնի Նախիջևանին Հայաստանի հարավով և գտնվի ամերիկյան կոնսորցիումի կառավարման ներքո։ Օգոստոսի 10-ին Իրանի իշխանությունները հայտնել էին, որ Սյունիքով անցնող միջանցքի նախագիծը հաշվի է առնում Թեհրանի հիմնական պահանջները։ Իրանի գերագույն առաջնորդի խորհրդական Ալի Աքբար Վելայաթին, սակայն, հայտարարել էր, որ Թեհրանը կխոչընդոտի ամերիկյան, այսպես կոչված, «Զանգեզուրի միջանցքի» ստեղծմանը։
Օգոստոսի 12-ին ՀՀ ԱԳՆ-ն հրապարակել էր Հայաստանի և Ադրբեջանի միջև խաղաղության և միջպետական հարաբերությունների հաստատման մասին համաձայնագիրը, որն օգոստոսի 9-ին Վաշինգտոնում նախաստորագրվել էր երկու երկրների արտգործնախարարներ Արարատ Միրզոյանի և Ջեյհուն Բայրամովի կողմից։
Կարդացեք նաև՝
ԱՄՆ միջանցքի նախագիծը Հայաստանին տալիս է ժամանակ, բայց ոչ երաշխիքներ․ Սուրեն Պարսյան
