Հայաստանում ԵՄ և ԱՄՆ դեսպանները դարձել են քաղբանտարկյալների, այդ թվում՝ «Տաշիր» ընկերությունների խմբի նախագահ Սամվել Կարապետյանի, կալանավորված սրբազանների բանտապահները, քանի որ աչք են փակում հակաժողովրդավարական երևույթների վրա, հայտարարել է Հայաստանի Հանրապետական կուսակցության փոխնախագահ Արմեն Աշոտյանը շուրջ 2 տարի տևած կալանքից հետո հրավիրված ասուլիսի ժամանակ։
Նրա խոսքով՝ Հայաստանի այսօրվա քաղբանտարկյալները ոչ միայն վարչապետ Նիկոլ Փաշինյանի քաղբանտարկյալներն են, այլև այն «բոլոր դիվանագիտական կառույցների, միջազգային ինստիտուտների, ուժերի, որոնք տարիներ շարունակ հեքիաթներ էին պատմում Հայաստանի ժողովրդավարության մասին»։
«Մինչդեռ իրականության մեջ այդ կառույցներն իվիճակի չեն պաշտպանել իրենց արժեքներն այն երկրում, որի վրա տոտալ ազդեցություն ունեն։ Որևէ մեկը կասկածո՞ւմ է, որ ցանկացած ԵՄ անդամ երկրի ղեկավար ասեր՝ Նիկո՛լ, սիրուն չի, քաղբանտարկյալներին ազատիր, համահունչ չես մեզ հետ», վստահ եմ, որ կազատեր»,- ընդգծել է նա։
Աշոտյանը նաև անդրադարձել է Կարապետյանի քաղաքական ուժին ու նրա թիմին, չշտապելու կոչ է արել նրանց։ Նա հստակեցրել է, որ նոր ուժի շուրջ ձևավորված սպասելիքները չպետք է շտապեցնեն Կարապետյանի թիմին։ Միևնույն ժամանակ ընդգծել է, որ կարող է նոր ուժի ընկերը լինել։
«Հայաստանում քաղաքական նոր ուժերի ստեղծման համար պարարտ հող կա, ինչն ակնհայտ է սոցոլոգիական հետազոտություններով։ Այդ մասին է վկայում նաև այն, որ ընդդիմությունն այսօր այդքան չճուն չէ։ Նոր ուժերի ի հայտ գալու հարցում ընդդիմադիր ուժերը պետք է որ շահագրգռված լինեն։ Ինչ վերաբերում է Կարապետյանի հետ շախկապվող քաղաքական զարգացումներին, ապա ՀՀԿ-ն շահագրգռված է, որ իրեն գաղափարական իմաստով մոտ և որքան հնարավոր է ուժեղ միավոր ձևավորվի։ Այդուհանդերձ, կարծում եմ, որ այս դաշտում մի քիչ շտապում ենք այն առումով, որ այս հարցն ավելի հաճախ է քննարկվում, քան այդպիսի բան ենթադրում են օբյեկտիվ և տեսանելի իրադարձությունները»,- շեշտել է Աշոտյանը։
Նրա խոսքով՝ «թեպետ հանրության կողմից ակնկալիքներ կան, բայց լրատվա-քաղաքական դիսկուրսը չպետք է շտապեցնի, ոչ էլ ուշացնի Կարապետյանի թիմին»։
ՀՀԿ փոխնախագահը նշել է, որ այժմ իշխանությունները գնալով դառնում են անբարո, ընդդիմությունը՝ ցավոք անմրցունակ։ Աշոտյանի դիտարկմամբ՝ Հայաստանում գլխավոր խնդիրը Փաշինյանն է։
«Մենք պետք վերադարձնենք ընդդիմության մրցունակությունը։ Մեզ հաճախ են ասում՝ Փաշինյանը ծրագիր ունի, դուք ծրագիր չեք բերում։ Այս հարցադրումը մանիպուլյատիվ է։ Այո, Նիկոլն ունի հիվանդին մեռցնելու ծրագիր, իսկ երբ ընդդիմությանն ասում ենք ծրագիր բեր՝ Նիկոլին անմեղ ենք դարձնում։ Նիկոլն ինքն է ծնում խնդիր, ու լուծման էլ ավելի վատ տարբերակ առաջարկում՝ իր իսկ ստեղծած խնդրին։ Պարզ օրինակ բերեմ․ ունենք ծանր հիվանդ, տարել ենք վատ բժիշկի մոտ, որն աչքն ուղղելու փոխարեն ունենք էլ հետն է հանել։ Մենք, որպես հարազատ, կասե՞նք՝ այդ վատ բժիշկը գոնե գիտի, ինչպես է սպանում, թե՞ կվերցնենք հիվանդին ու կտանենք ուրիշ բժիշկի մոտ, ով գոնե առաջին փուլում ուռուցքը կհեռացնի։ Այսինքն, մենք ունենք քաղցկեղ՝ ի դեմս Նիկոլի, և մետաստազներ, ի դեմս իր կողմից ստեղծված բազմաթիվ խնդիրների, ու ասում ենք՝ քաղցկեղը գիտի մետաստազների բուժումը, իսկ ընդդիմություն, դու գիտե՞ս բուժումը։ Չէ, չգիտենք, միայն գիտենք, որ ուռուցքը պետք է հեռացնել, հետո զբաղվել մետաստազներով»,- նշել է ՀՀԿ փոխնախագահը։
Աշոտյանը, խոսելով նաև Վաշինգտոնում ԱՄՆ նախագահի մասնակցությամբ Փաշինյան-Ալիև հնարավոր հանդիպման մասին, ընդգծել է, որ Թրամփի պաշտոնավարման ընթացքը Նոբելյան մրցանակի համար բոնուսներ հավաքելու գործընթացի է վերածվել։
«Թրամփի համար հայ-ադրբեջանական կոնֆլիկտի, թեկուզև «թրամփավարի» հանգուցալուծումը կարող է Նոբելյան մրցանակի կրեդիտի բոնուսը լինել։ Նման տեսակի գործարկի ի հայտ գալը խնդրահարույց է լինելու Հայստանի արտաքին և անվտանգային միջավայրերի համար», – հավելել է քաղաքական գործիչը:
2022 թվականի նոյեմբերի 16-ին Աշոտյանին մեղադրանք էր առաջադրվել պաշտոնեական լիազորությունները չարաշահելու և փողերի լվացման համար։ Նրան կալանավորել էին 2023 թվականի հունիսի 16-ին։ Իրավապահները որպես կալանավորման պատճառ նշել էին խափանման միջոցի խախտումը՝ բնակության վայրից չհեռանալու մասին ստորագրությունը։ 2025-ի մարտի 10-ին դատարանը որոշել էր 3 ամսով երկարաձգել Աշոտյանի տնային կալանքի ժամկետը։ 2025-ի հունիսի 9-ին տնային կալանքը երկու ամսով էր երկարաձգվել։ Օգոստոսի 1-ին Աշոտյանի տնային կալանքը դատարանը փոխարինել էր վարչական հսկողությամբ։
