Թուրքիան օգոստոսի 2-ից կսկսի Ադրբեջանից բնական գազ մատակարարել Սիրիա՝ օգնելով երկրին էլեկտրաէներգիա արտադրել, հայտարարել է Թուրքիայի էներգետիկայի նախարար Ալփարսլան Բայրաքթարը, փոխանցում են թուրքական լրատվամիջոցները։
Բնական գազը Սիրիա կմատակարարվի Ադրբեջանից՝ Թուրքիայի տարածքով անցնող Քիլիսի խողովակաշարով։
Սիրիայի նախկին նախագահ Բաշար ալ Ասադի ռեժիմի տապալումից հետո Թուրքիան այժմ լիակատար աջակցություն է ցուցաբերում Սիրիայի նոր կառավարությանը:
Բայրաքթարը նշել է, որ նախատեսվում է նախնական մատակարարել 6 միլիոն խորանարդ մետր բնական գազ, որով հնարավոր կլինի արտադրել շուրջ 1200 մեգավատտ էլեկտրաէներգիա։ Նախագծի ֆինանսավորմանը մասնակցում է նաև Կատարը։
Օգոստոսի 2-ին Քիլիսում կանցկացվի պաշտոնական արարողություն, որին կմասնակցեն Թուրքիայի, Սիրիայի և Կատարի նախարարները։
