Եթե Ամենայն Հայոց կաթողիկոսն ապօրինի է համարում սրբազանների կալանավորումը, ուրեմն կիսում է ռազմական հեղաշրջում անելու նրանց գաղափարաբանությունն ու պլանները, սոցիալական ցանցում նման տեսակետ է հայտնել վարչապետ Նիկոլ Փաշինյանը: Իր գրառման մեջ նա կիրառել է հոգևորականների աշխարհիկ անունները:
Ըստ վարչապետի՝ այս պարագայում Վաղարշապատի որևէ տարածք չի կարող իրավապահների գործունեության համար փակ լինել:
«Մանավանդ, Կտրիճի և մի քանի այլ անձանց շնորհիվ այդ տարածքները փակ չեն շնության համար»,- հավելել է Փաշինյանը։
Իրավապահ մարմինները հունիսի 25-ի և 27-ի խուզարկություններից հետո երկու ամսով կալանավորել էին Գալստանյանին ու Աջապահյանին, ինչպես նաև ընդդիմադիր «Սրբազան պայքար» շարժման 14 աջակիցների։ Աջապահյանը մեղադրվում է իշխանության բռնազավթման հրապարակային կոչեր հնչեցնելու մեջ, իսկ Գալստանյանը և «Սրբազան պայքարի» աջակիցները՝ պետական հեղաշրջման փորձ կազմակերպելու։ Բոլոր կալանավորվածները չեն ընդունում մեղադրանքը:
Մայիսի 29-ից սկսած Փաշինյանը սոցիալական ցանցերում հայհոյանքներով լի մի շարք գրառումներ էր արել Հայ Առաքելական եկեղեցու ներկայացուցիչների հասցեին, իսկ ավելի ուշ հանդես եկել նոր կաթողիկոս ընտրելու կոչով՝ կասկածի տակ դնելով նրա՝ կուսակրոնության ուխտի պահպանումը։
