Հայաստանյան 8 հասարակական կազմակերպություն հայտարարությամբ է հանդես եկել՝ ՀՀ կառավարությանը հորդորելով խզել «ՀՀ կառավարության և ՌԴ կառավարության միջև զանգվածային հեռահաղորդակցության ոլորտում համագործակցության մասին» համաձայնագիրը և դադարեցնել ռուսաստանյան հեռուստաալիքների հեռարձակումը ՀՀ-ում։
Հայտարարության հեղինակները վստահ են, որ ռուսաստանյան իշխանություններին մոտ կանգնած շրջանակները և մեդիա ռեսուրսները փորձում են ակտիվորեն միջամտել ՀՀ-ի հասարակական-քաղաքական և իրավական գործընթացներին և «ներազդել Հայաստանի ներքին իրավիճակի վրա՝ գալիք խորհրդարանական ընտրություններին ընդառաջ»։
Կազմակերպությունները, որպես այդպիսի փորձի օրինակ, մատնանշել են «Ռոսիա-1» հեռուստաալիքի եթերում «Երեկոն Վլադիմիր Սոլովյովի հետ» հաղորդաշարի վարողի՝ հունիսի 18-ին արած որակումները ՀՀ իշխանությունների, պետության ու ժողովրդի հասցեին։
Ըստ հայտարարության՝ Սոլովյովը ՀՀ իշխանություններին և, մասնավորապես, վարչապետին անվանել էր սրիկա, ծախու, «թուրքոլ» (թուրքամետ) և տարակուսել, թե «Հայաստանի ժողովուրդը որևէ մասնակցություն ունի՞ երկրի ճակատագրին վերաբերող հարցերին, թե՞ շուտով Հայաստանը կարժանանա Արցախի ճակատագրին»։
Կազմակերպությունների կարծիքով՝ բազմաթիվ հիմնավորումներ են կուտակվել պայմանագրի խզման համար, և այս քայլով անհրաժեշտ է դադարեցնել ռուսաստանյան հեռուստաալիքների հեռարձակումը ՀՀ հանրային մուլտիպլեքսով, անհրաժեշտ այլ միջոցառումներ ձեռնարկել և համապատասխան քննարկումներ կազմակերպել փորձագիտական հանրության հետ՝ «Հայաստանի տեղեկատվական միջավայրն օտարերկրյա հիբրիդային ազդեցությունից պաշտպանելու նպատակով»։
ԱԺ-կառավարության հարցուպատասխանի ժամանակ ԲՏԱ նախարար Մխիթար Հայրապետյանը հայտարարել էր, որ հաղորդումը հեռարձակվել էր ցանցային օպերատորների միջոցով։ Նրա խոսքով՝ հաջորդ նստաշրջանի ժամանակ համապատասխան կարգավորմամբ՝ վերահսկողություն կհաստատվի նաև ցանցային օպերատորների հեռարձակման բովանդակության վրա։
