Փորձագետները հայտնել են Իրանում իրավիճակն ապակայունացնելու փորձերի մասին։ Թյուրքագետ Վարուժան Գեղամյանի կարծիքով՝ Իրանը թուլացնելու նպատակով պետությունը ներսից պառակտելու փորձեր կարվեն, և դա կիրականացնեն Իրանի հյուսիս-արևմուտքում ապրող թյուրքախոսները։
«Պատահական չէ, որ այս օրերին թուրքական վերլուծական ու համացանցային տիրույթում արդեն սկսել են ակտիվորեն քննարկել Իրանի տարածքում ապրող թյուրքախոսների իրավունքների հարցը: Իրանը ներսից պառակտելու առաջնայնությունը «հատկացվում է» Իրանի հյուսիս-արևմուտքում ապրող թյուրքախոսներին, որոնց Բաքուն ու Անկարան կոչում են «հարավային ադրբեջանցիներ»: Սա նաև հակահայկական գործունեություն է»,- գրել է նա:
Գեղամյանը հավելել է՝ որքան Իրանի վրա բազմակողմանի ճնշումը խորանա, այդքան ակտիվանալու են թուրք-ադրբեջանական պանթյուրքական խմբերը, որոնք ներսից փորձելու են պառակտել ու քայքայել իրանական պետությունը:
Իրանագետ Վարդան Ոսկանյանի կարծիքով՝ Իսրայելն իր նպատակաուղղված հարվածներով ցանկանում է Իրանին զրկել գիտնականներից, որոնք կարող են զարգացնել միջուկային տեխնոլոգիաներ, և դիվանագետներից, որոնք միջազգային հարթակներում պաշտպանում են պետության՝ միջուկային տեխնոլոգիաներ ունենալու իրավունքը։
«Իրան-Իսրայել պատերազմի ընթացքում իսրայելցիներն արդեն իսկ թիրախավորել և սպանել են մի շարք իրանցի ֆիզիկոս-գիտնականների։ Միջուկային ծրագիր ունենալու իրավունքը պաշտպանող հաջող դիվանագիտությունը ոչ պակաս կարևոր է, քան այդ ծրագիրը գիտականորեն առաջ մղելը»,- գրել է նա։
Իսրայելը հունիսի 12-ի լույս 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ Պաշտոնական Երևանը դատապարտել էր Իսրայելի միակողմանի հարձակումն Իրանի վրա։ Երկու կողմն էլ հայտնել է զոհերի և բազմաթիվ տուժածների մասին:
