Իսրայելը չի բացառում Իրանի միջուկային օբյեկտներին առաջիկա ամիսներին հարված հասցնելու հնարավորությունը՝ չնայած Միացյալ Նահանգների կողմից աջակցության բացակայությանը, հայտնում է Reuters-ը՝ հղում անելով իր աղբյուրներին։
Ըստ գործակալության տվյալների՝ վերջին ամիսներին Իսրայելն ԱՄՆ նախագահ Դոնալդ Թրամփի վարչակազմին առաջարկել է մի շարք տարբերակներ՝ իրանական թիրախներին հարվածելու համար, այդ թվում՝ գարնան վերջին և ամռանը։ Ծրագրերը ներառում են ավիահարվածների և հատուկ նշանակության ուժերի գործողությունների համադրություն, որոնք տարբերվում են ինտենսիվությամբ, ասվում է հաղորդագրության մեջ։
Հարվածները կարող են նվազեցնել Թեհրանի կարողությունը՝ մի քանի ամսից մինչև մեկ տարուց ավելի ժամանակահատվածում իր միջուկային ծրագիրը ռազմական նպատակներով օգտագործելու հետ կապված։
Գործակալությունը նշել է, որ ավելի վաղ The New York Times-ը հայտնել էր, որ Թրամփն Իսրայելի վարչապետ Բենիամին Նեթանյահուին փոխանցել է, որ Վաշինգտոնը Թեհրանի հետ բանակցությունները համարում է առաջնահերթություն և չի ցանկանում աջակցել Իրանի միջուկային օբյեկտներին հարվածելուն կարճաժամկետ հեռանկարում։
«Սակայն իսրայելցի պաշտոնյաներն այժմ կարծում են, որ իրենց զինվորականները կարող են դրա փոխարեն սահմանափակ հարված հասցնել Իրանին, որը կպահանջի ԱՄՆ-ի ավելի քիչ աջակցություն: Նման հարձակումը կլինի զգալիորեն ավելի փոքր մասշտաբով, քան այն տարբերակները, որոնք Իսրայելը սկզբում առաջարկել էր Վաշինգտոնին»,- գրել է գործակալությունը:
Իրանի բարձրաստիճան պաշտոնյան Reuters-ին հայտնել է, որ Թեհրանը տեղյակ է Իսրայելի ծրագրերի մասին, և որ հարձակումը կհանգեցնի Իրանի կողմից «կոշտ և վճռական պատասխանի»։ Աղբյուրը նշել է, որ Թեհրանը հուսալի աղբյուրներից ստացված հետախուզական տվյալներ ունի, որ Իսրայելը խոշոր հարձակում է պլանավորում Իրանի միջուկային օբյեկտների վրա։
Ապրիլի 12-ին Իրանի և ԱՄՆ-ի ներկայացուցիչներն Օմանում անուղղակի բանակցություններ էին վարել Իրանի միջուկային ծրագրի շուրջ ստեղծված իրավիճակի վերաբերյալ։ Ըստ լրատվամիջոցների՝ Թեհրանը Վաշինգտոնին հայտնել էր, որ պատրաստ է սահմանափակել ուրանի հարստացումը, եթե իրեն տրվեն հուսալի երաշխիքներ, որ ԱՄՆ նախագահը կրկին չի հրաժարվի գործարքից։
