Ամերիկյան արժույթը խիստ ճնշման տակ է հայտնվել ԱՄՆ նախագահ Դոնալդ Թրամփի կողմից լայնածավալ մաքսատուրքերի մասին հայտարարությունից հետո, ԱՄՆ դոլարը նվազել է բոլոր հիմնական արժույթների նկատմամբ, տեղեկացնում է РБК-ն։
ԱՄՆ-ի առևտրային գործընկերների մասշտաբային մաքսատուրքերը, որոնք հայտարարել է Թրամփը, ամենաշատը թուլացրել են ամերիկյան արժույթը վերջին երկուսուկես տարում, հաշվարկել է Bloomberg-ը։
Ըստ աղբյուրի՝ իենի և շվեյցարական ֆրանկի նկատմամբ այն նվազել է մոտ 2%-ով, եվրոյի և ֆունտի նկատմամբ՝ ավելի քան 1%-ով: Կանադական դոլարի նկատմամբ ԱՄՆ դոլարի փոխարժեքն իջել է մինչև դեկտեմբերի կեսերից ի վեր ամենացածր մակարդակը։
«Մարդիկ այժմ կենտրոնացած են այն տնտեսական հետևանքների վրա, որոնք կարող են ունենալ այդ մաքսատուրքերը հենց Միացյալ Նահանգների համար»,- հայտարարել է DZ Bank AB-ի արժութային և դրամավարկային հետազոտությունների բաժնի ղեկավար Սոնյա Մարտենը։
Deutsche Bank-ը հայտարարել է դոլարի նկատմամբ վստահության հնարավոր ճգնաժամի մասին։ Կապիտալի հոսքերի բաշխման փոփոխությունները կարող են դուրս գալ արժութային հիմունքներից և հանգեցնել փոխարժեքի անկանոն տատանումների, զգուշացրել են փորձագետները:
Deutsche Bank-ի փորձագետ Ջորջ Սարավելոսը նշել է, որ դոլարի անկման արագացումն անցանկալի կլինի համաշխարհային կենտրոնական բանկերի համար։
Ավելի խիստ մաքսատուրքեր, քան նախկինում ակնկալվում էր, կարող են տարեկան տրիլիոնավոր դոլարներով բարձրացնել ԱՄՆ ներմուծվող ապրանքների գները, գրում է գործակալությունը։
JPMorgan-ի վերլուծաբանները, իրենց հերթին, նշում են, որ սակագներն զգալիորեն ավելի բարձր են, քան գնահատված վատագույն սցենարը: Fitch վարկանիշային գործակալությունը նախազգուշացրել է, որ սակագները «խաղը փոխում են» ինչպես ԱՄՆ-ի, այնպես էլ համաշխարհային տնտեսությունների համար:
«Շատ երկրներ, ամենայն հավանականությամբ, կբախվեն ռեցեսիայի»,- կարծում է Fitch-ի փորձագետ Օլու Սոնոլան:
Ապրիլի 3-ին ԱՄՆ նախագահը մի շարք երկրների, այդ թվում՝ Հայաստանի համար մաքսատուրք էր սահմանել։ Հայաստանի համար սահմանված մաքսատուրքը 10% է։
