ՀՀ հակակոռուպցիոն դատարանի դատավոր Վահե Դոլմազյանի որոշմամբ՝ 2024թ․ սեպտեմբերի 20-ից ապօրինի կալանքի տակ գտնվող գործարար Կարեն Հակոբյանի կալանքը երկարաձգվել է ևս 2 ամսով, տեղեկացնում է Հակոբյանի պաշտպանական խումբը։
«Դոլմազյանն իր կայացրած դատական ակտով որևէ կերպ չի պատճառաբանել ո՛չ կալանքի երկարաձգման անհրաժեշտությունը և ոչ էլ՝ այլընտրանքային խափանման միջոցների կիրառման անհնարինությունը։ Նա ընդհանրապես չի անդրադարձել շուրջ 7 ժամ տևած դատական նիստով և նախօրոք ներկայացրած գրավոր դիրքորոշմամբ պաշտպանական կողմի արտահայտած իրավական և փաստական հիմնավորումներին»,- ասված է հաղորդագրությունում։
Փաստաբանական թիմը նշել է, որ դատարանը շարադրել է Հակոբյանի կողմից վարույթին խոչընդոտելու հավանականության մասին խիստ վերացական ու կարծրատիպային ենթադրություններ, որոնք և՛ Մարդու իրավունքների եվրոպական դատարանի, և՛ ՀՀ վճռաբեկ դատարանի նախադեպային որոշումներով բավարար չեն կալանքի երկարաձգման որոշում կայացնելու համար։
Նշվում է, որ պաշտպանական կողմն այսօր վերաքննիչ բողոք է ներկայացրել Դոլմազյանի կայացրած կալանքի երկարաձգման որոշման դեմ։ Հակոբյանը մեղադրվում է փողերի լվացման համար։
