Ոսկու շուկայի և երևանյան այլ շուկաների մի խումբ աշխատակիցներ այսօր՝ հունվարի 23-ին, բողոքի ակցիա են իրականացրել կառավարության շենքի մոտ։ Նրանք պահանջում են չեղարկել շրջանառության հարկը 5%-ից 10% դարձնելու որոշումը կամ իրենց ոլորտի համար սահմանել հատուկ պայմաններ։
Մալաթիայի Ոսկու շուկայի բազմամյա աշխատակից Անահիտ Ղարիբյանն Armenia Today-ին ասաց, որ հավաքված մարդիկ ստեղծված խնդրին ունեն տարբեր մոտեցումներ և դեռևս չկա մեկ միասնական դիրքորոշում, թե ինչ պահանջել կառավարությունից։
«Բոլոր շուկաների ներկայացուցիչները կհավաքվեն, առաջարկների համաձայնեցված ցուցակ կկազմեն ու կներկայացնեն կառավարություն։ Այս պահին մեկ միասնական առաջարկ չկա»,- նշեց նա։
Տնտեսվարողներն իրենց խնդրին լուծում չտալու պարագայում սպառնում են գործադուլ անել։
«Հարյուր օրենք միանգամից թափել են գլխներիս։ Թո՛ղ մի օրենք ընդունեն, եթե արդարացնի՝ անցնեն մյուս օրենքին։ Միանգամի՛ց՝ 10%, միանգամի՛ց հայտարարագիր, միանգամի՛ց թղթաբանություն։ Մի ապրանք առնելու համար 6 թուղթ է պետք։ 6 թուղթ՝ մեկ կուլոնի (կախազարդ) համար որտե՞ղ պահեմ»,- դժգոհեց շուկայի աշխատողներից մեկը։
Ակցիայի մասնակիցները նշեցին, որ կառավարությունից որևէ մեկը չի իջել իրենց մոտ, չի հարցրել, թե ինչու են հավաքվել։
«Երկու ժամ էլ կանգնենք՝ միևնույն է, ոչ ոք չի իջնելու։ Ինքներդ կանգնած եք, տեսեք, իջնող լինելո՞ւ է, թե՞ ոչ։ Հարկատուն ոչ թե հերոս է, այլ գործիք։ Աշխատող ժողովրդին ոչ ոք չի լսում։ Ոչ մեկի ցավը ոչ մեկին հետաքրքիր չէ»,- լրագրողներին դիմեց մեկ այլ մասնակից։
Տնտեսավարողների խոսքով՝ իրենց հարկային բեռի ավելացումը համընկել է վաճառքի քանակի նվազման շրջանի հետ, ինչն առավել խոցելի է դարձնում իրենց գործունեությունն ու կարող է բերել բիզնեսի փակման։
Երևանի ավագանու «Մայր Հայաստան» խմբակցության ղեկավար Մանուկ Սուքիասյանն Armenia Today-ին ասաց, որ շրջհարկի ավելացումը կարող է լինել շարունակական ու կարող է հասնել ընդհուպ ավելացված արժեքի հարկի ավելացման։
«Մարդիկ, բացի իրենց եկամուտներին հարվածող հարկային ավելացումից, առանձնահատուկ շեշտում են, որ 2018 թվականից հետո իրենց քվեն, հույսն ու հավատն են այս իշխանությունները սասանել, և այդ առումով իրենք հուսախաբված են։ Տրանսպորտը, հարկերի ավելացումը, հայտարարագրման համակարգը սոցիալական բողոք են ստեղծել։ Մանր բիզնեսից հասույթը մեր բյուջեում կազմում է 2-2,5%-ը։ Թույլ տալ, որ այդ մարդիկ լուծեն իրենց սոցիալական խնդիրները, պետության համար ոչ մի ֆինանսական բարդություններ չի հարուցելու»,- շեշտեց նա։
Ակցիայի երկու մասնակցի կառավարությունում ընդունել են, լսել նրանց բողոքն ու խոստացել եռօրյա ժամկետում ընդունել նրանց ավելի բարձր մակարդակով ու ոլորտային նրբությունները հաշվի առնելով, տալ հարցի լուծումը։
2024 թվականի մայիսի 2-ի նիստի ժամանակ կառավարությունը որոշել էր բարձրացնել փոքր և միջին բիզնեսի շրջանառության հարկի դրույքաչափը՝ գործող 5-ի փոխարեն սահմանելով 10%-ի սահմանաչափ։ Հարկային շեմի բարձրացմամբ՝ կառավարությունը նախատեսել էր 17,8 միլիարդ դրամի պետական եկամուտների աճ ունենալ։
Հունվարի 13-ին Ոսկու շուկայի աշխատակիցները բողոքի ակցիա էին իրականացրել նույն պահանջով։ ԱԺ-Կառավարություն հունվարի 22-ին տեղի ունեցած հարցուպատասխանի ժամանակ ՀՀ վարչապետ Նիկոլ Փաշինյանն ասել էր, որ «շրջանառության հարկը մարդկանց դրդում է չմեծանալ»։
