Կիպրոսի նախագահը մի քանի օրում երկրորդ անգամ հանդիպել է Թուրքիայի արտգործնախարարի հետ

Կիպրոսի նախագահ Նիկոս Խրիստոդուլիդեսը մի քանի օրվա ընթացքում երկրորդ անգամ հանդիպել է Թուրքիայի արտգործնախարար Հաքան Ֆիդանի հետ և առաջարկել է ուղիղ երկխոսություն սկսել Նիկոսիայի և Անկարայի միջև, փոխանցել է Phileleftheros-ը։

Նա նշել է, որ երկխոսությունն անհրաժեշտ է համակարգված և բազմակողմ բանակցություններ նախապատրաստելու համար, գրում է լրատվականը։ 

Ըստ կայքի՝ Խրիստոդուլիդեսի և Ֆիդանի հանդիպումը տեղի է ունեցել Բաքվում COP-29-ը համաժողովի շրջանակում։ Դիվանագիտական ​​հարաբերություններ չունեցող երկու երկրների միջև ուղիղ շփումների գաղափարը նպատակ ունի աջակցել ՄԱԿ-ի գլխավոր քարտուղար Անտոնիո Գուտերեշի ջանքերին՝ կիպրական կարգավորման շուրջ համաժողով կազմակերպելու համար, գրել է կայքը։

Նշվում է, որ նախկինում Կիպրոսի նախագահն ու Թուրքիայի արտգործնախարարը հանդիպել էին նոյեմբերի 7-ին Բուդապեշտում՝ Եվրոպական քաղաքական համայնքի գագաթնաժողովի շրջանակներում։

Նշենք, որ ՀՀ-ից որևէ պաշտոնյա մասնակցության հայտ չի ներկայացրել Բաքվում ընթացող համաժողովին։