Կիրանց գյուղի դաշտերում ականի վրա տրակտոր է պայթել․ տրակտորիստը թեթև վնասվածքներ է ստացել

Տավուշի մարզի Կիրանց գյուղի դաշտերում ականի վրա տրակտոր է պայթել, Armenia Today-ին հայտնել է «Հայաստան» խմբակցության պատգամավոր Գառնիկ Դանիելյանը։ Նա հավելել է, որ տրակտորիստը թեթև վնասվածքներ է ստացել։

Պատգամավորը նաև հայտնել է, որ Կիրանց գյուղ տանող նոր ճանապարհի հետ կապված վեճ է ծագել հայ և ադրբեջանցի սահմանապահների միջև։

«Ադրբեջանցիներն ասել են, որ նոր ճանապարհի ինչ-որ մասն իրենց տարածքի մեջ է մտնում»,- մանրամասնել է Դանիելյանը։

Կիրանց բնակիչ Գոհար Վարդանյանը հուլիսի 23-ին հայտնել էր, որ ադրբեջանցիները հնձել են կիրանցեցիների ցանած հացահատիկը։

Տավուշի սահմանամերձ գյուղերի բնակիչները բողոքի ակցիաներ էին սկսել ՀՀ ԱԳՆ-ի՝ ապրիլի 19-ի հայտարարությունից հետո, որով Հայաստանն ու Ադրբեջանը պայմանավորվել էին սահմանազատման գործընթացը սկսել Տավուշից։ Բնակիչները հայտարարել էին, որ դեմ են Հայաստանի զիջումներին։ Մայիսի 4-ին «Տավուշը հանուն հայրենիքի» շարժումը երթ էր սկսել դեպի Երևան, ուր հասել էին մայիսի 9-ին և նույն օրն անցկացրել առաջին հանրահավաքը՝ հայտարարելով, որ պատրաստվում են ԱԺ-ում  ՀՀ վարչապետ Նիկոլ Փաշինյանի նկատմամբ անվստահության գործընթաց սկսել։

Երևանն ու Բաքուն մայիսի 15-ին ստորագրել էին Տավուշում սահմանի սահմանազատման արձանագրությունը։ Մայիսի 24-ին ՀՀ ԱԱԾ-ն հայտարարել էր, որ սահմանապահ զորքերը Տավուշում պաշտոնապես անցել են Ադրբեջանի հետ սահմանազատված սահմանի պահպանությանը, որը կիրականացվի Բերքաբեր բնակավայրի 1,9 կմ, Ոսկեպար և Բաղանիս բնակավայրերի 4,9 կմ հատվածներում։

Հունիսի 10-ին ցուցարարները վրաններ էին տեղադրել Ազգային ժողովի շենքի դիմաց՝ փակելով Բաղրամյան պողոտան։ Հունիսի 12-ին ԱԺ շենքի մոտ տեղի ունեցած հավաքն ավարտվել էր բախումներով։ Հունիսի 19-ին «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը հայտարարել էր, որ շարժումը պայքարի վերադասավորման փուլում է։

ՀՀ կառավարությունը մայիսի 15-ին հայտարարել էր, որ սահմանազատումից և սահմանագծումից հետո Կիրանցում ճանապարհների հետ կապված խնդիրներ կառաջանան և խոստացել էր լուծել այն 3 ամսվա ընթացքում։ Մայիսի 19-ին վարչապետի աշխատակազմի ղեկավար Արայիկ Հարությունյանը հայտնել էր, որ մեկնարկել է Կիրանց-Աճարկուտ ճանապարհի վերակառուցումը, որը շահագործման կհանձնվի 2 ամսից։