Արցախի նախագահին առընթեր հակաճգնաժամային խորհրդի ղեկավար Տիգրան Պետրոսյանը հրապարակել է Ադրբեջանի կազմում Լեռնային Ղարաբաղի հայերի անվտանգության և իրավունքների մասին փաստաթղթի նախագիծը, որն առաջարկել է Ռուսաստանը։ 
Պետրոսյանը Facebook-ում պարզաբանել է, որ դա այն փաստաթուղթն է, որն առաջարկել է ՌԴ արտգործնախարար Սերգեյ Լավրովը հուլիսի 25-ին։
«Պետք է հրապարակեմ, որ հասարակությունը հասկանա, թե ինչ է կատարվում»,- կից գրառում է կատարել Պետրոսյանը։
Նախագիծը ներառում էր այնպիսի սկզբունքներ, ինչպիսիք են հայ բնակչության պաշտպանությունը խտրականությունից, նրանց բռնի վերաբնակեցման արգելքը, «հայ բնակչությամբ խիտ բնակավայրերում» հայերենն օգտագործելու ազատությունը։
Կան նաև կետեր Հայաստանի բնակչության համամասնական ներկայացվածության վերաբերյալ բոլոր ուժային կառույցներում, այդ թվում՝ օրենսդիր, դատական և գործադիրում։
Նախագծի համաձայն՝ հայ բնակչության կողմից ստեղծված հասարակական և կրոնական կազմակերպությունները, ինչպես նաև հայերեն լեզվով լրատվամիջոցները պետք է շարունակեն իրենց աշխատանքը։ Դպրոցներում պետք է շարունակվի հայերենով ուսուցումը: Նախագծում ընդգծվում է նաև «նախկին Լեռնային Ղարաբաղի Ինքնավար Մարզի և Հայաստանի Հանրապետության հայ բնակչության միջև մարդասիրական կապերի զարգացման անհրաժեշտությունը»։
Օգոստոսի 25-ին Լավրովը, Արարատ Միրզոյանի և Ջեյհուն Բայրամովի հետ հանդիպումից հետո, հայտարարել էր, որ անհրաժեշտ է համոզել Արցախի ժողովրդին հանդիպել Ադրբեջանի ներկայացուցիչների հետ՝ իրավունքների և անվտանգության երաշխիքները համաձայնեցնելու նպատակով։ Ավելի ուշ լրատվամիջոցներին հայտնի էր դարձել Արցախում ճգնաժամի կարգավորման համար Ռուսաստանի առաջարկած «փոխզիջման» ձախողման մասին։
