Հայաստանն Ադրբեջանին է փոխանցել խաղաղության պայմանագրի շուրջ իր առաջարկությունները, և մենք պատրաստ ենք ստորագրել այդ բովանդակության պայմանագիր։ Այս մասին կառավարության դեկտեմբերի 22-ի նիստի ժամանակ ասաց ՀՀ վարչապետ Նիկոլ Փաշինյանը։
«Հույս ունեմ, որ Ադրբեջանի արձագանքը նույնպես դրական կլինի։ Հայկական կողմը դեռևս ամիսներ առաջ Ադրբեջանին է փոխանցել սահմանազատման և սահամանային անվտանգության հարցերով հանձնաժողովի հետագա աշխատանքների հետ կապված իր առաջարկները, սակայն մինչ օրս պատասխան չենք ստացել։
ՀՀ-ն Ադրբեջանին է փոխանցել տարածաշրջանային կոմունիկացիների իր առաջարկները և պատրաստ է այդ ճանապարհով գնալ հարցի անհապաղ լուծման։ Ամիսներ առաջ Ադրբեջանին է փոխանցվել սահմանային անվտանգության երաշխավորման մասին իր առաջարկները, բայց մինչ օրս պատասխան չենք ստացել։
Ասեմ, որ այդ առաջարկները ներառում են նաև ՀՀ օկուպացված տարածքների խնդրի լուծումը, մեր դիրքորոշումը շարունակում է մնալ բույնը, որ Ադրբեջանը պետք է դադարեցնի ՀՀ ինքնիշխան տարածքների օկուպացիայի հարցը և նրա զորքերը պետք է ետ քաշվեն ՀՀ ինքնիշխան տարածքից»,- ասաց նա։
Փաշինյանը հիշեցրել է, որ կառավարության նախորդ նիստում արձանագրել է մեր հավաքական ջանքերի կարևորությունը Լաչինի միջանցքը Ադրբեջանի կողմից ապօրինի շրջափակելու փաստի միջազգային տեսանելիությունը մեծացնելու համար և մենք տեսնում ենք, որ ԼՂ շուրջ ստեղծված սուր ճգնաժամը բավականին մեծ միջազգային արձագանք է ստացել։
Վարչապետը նաև ընդգծեց նախորդ օրը ՄԱԿ ԱԽ նիստում կարևորագույն քննարկման մասին, որտեղ տարբեր երկրներ և միջազգային կազմակերպություններ շարունակում էին հստակ գնահատականներ հնչեցնել ստեղծված իրավիճակին։
«Ուզում եմ շնորհակալություն հայտնել հստակ գնահատական հնչեցրած բոլոր երկրներին և միջազգային կազմակերպություններին, նաև հայաստանյան և սփյուռքյան կազմակերպություններին, անհատներին, մասնագիտական խմբերին, ովքեր ջանքեր են գործադրում Լաչինի միջանցքի շուրջ ստեղծված իրավիճակի միջազգային տեսանելության աճի համար, միասնական ջանքերը պետք է մեծացնել, ակտիվորեն պետք է աշխատել ԼՂ, Լաչինի միջանցք ՄԱԿ-ի, ԵԱՀԿ-ի կամ ԵԱՀԿ Մինսկի խմբի փաստահավաք առաքելություն ուղարկելու համար»,- ասաց Փաշինյանը։
Հիշեցնենք, որ ՄԱԿ-ի Անվտանգության խորհուրդը քննարկել է իրավիճակը Լաչինի միջանցքում։ Նիստի ընթացքում ԱՄՆ-ի, Ռուսաստանի, Ֆրանսիայի և Մեծ Բրիտանիայի ներկայացուցիչները հայտարարել են միջանցքով երթևեկությունը վերականգնելու անհրաժեշտության մասին:
